Bul referendým barlyq demokratııalyq qaǵıdattarǵa sáıkes keledi - Májilis depýtaty
2022 jylǵy 21 mamyr 21:05

Bul referendým barlyq demokratııalyq qaǵıdattarǵa sáıkes keledi - Májilis depýtaty

NUR-SULTAN. QazAqparat – QR Parlamenti Májilisiniń depýtaty, «AMANAT» partııasy fraktsııasynyń múshesi Samat Musabaev aldaǵy referendýmnyń mán-mańyzy jáne zańnamalar júzinde engiziletin ózgerister týraly oı bólisti, dep habarlaıdy QazAqparat.

«Endigide Memleket basshysy qandaıda bir oblys, ne respýblıkalyq mańyzy bar qala ákimi laýazymyna jalǵyz emes, birneshe kandıdatty balamaly negizde usynady. Olardy oblystyq nemese qalalyq máslıhat depýtattary tańdaıtyn bolady. Demek, budan bylaı oblys ákimi de saılanady deı alamyz. Іs júzinde aımaq basshysy kim bolatynyn jergilikti depýtattar aıqyndaıdy», - deıdi depýtat.

Sondaı-aq, Samat Musabaev Parlament pen máslıhattar depýtattary quramynyń jasaqtalýyna qatysty ózgeristerdi de atap ótti.

«Prezıdenttiń Senattaǵy kvotasy 15 depýtattan 10-ǵa deıin qysqarady. Májilistiń depýtattyq korpýsynyń 70 paıyzy proportsıonaldyq, 30 paıyzy majorıtarlyq tásilmen jasaqtalady. Oblystyq máslıhattardyń 50 paıyzy majorıtarlyq júıemen, 50 paıyzy partııalyq tizimmen, al aýdandyq deńgeıde 100 paıyz depýtattar majorıtarlyq tásilmen saılanbaq. Onymen qosa, endi Májilis 107 emes 98 depýtattan quralmaq», - dedi ol.

Elimizdegi júrip jatqan osy saıası reformalardyń arqasynda Májiliske ártúrli kózqarastaǵy azamattardyń kelýine jol ashylyp, saıası básekelestiktiń artýy men demokratııanyń damı túsetinin aıtty.

«Qoldanystaǵy zańnamaǵa sáıkes Konstıtýtsııaǵa engiziletin túzetýlerdiń barlyǵyn Parlament qabyldaýy tıis. Alaıda, aldaǵy aýqymdy ári mańyzdy ózgerister el bolashaǵyna aıryqsha áser etedi. Sol sebepti de, Prezıdentimiz Qasym-Jomart Toqaev respýblıkalyq referendým ótkizý týraly jarlyqqa qol qoıdy. Referendým - jarqyn keleshektiń irgetasyn qalaıtyn asa mańyzdy shara. Óıtkeni, qoǵamda kúrmeýi sheshilmeı kele jatqan kúrdeli máseleler tym kóp. Sol sebepti, «Halyq únine qulaq asatyn memleket» tujyrymdamasyn alǵa qoıa otyryp, osyndaı mańyzdy sheshim qabyldandy dep baǵaladym. Álbette, elimiz zor ózgerister aldynda tur. Sondyqtan, 5 maýsym kúni ár qazaqstandyqty óziniń azamattyq boryshyn oryndaýǵa shaqyramyn. Bul referendým barlyq demokratııalyq qaǵıdattarǵa sáıkes keledi dep esepteımin», - dep túıindedi Samat Musabaev.


Seriktester jańalyqtary

Jańalyqtar

Úrdis

MURAǴAT