Jumys qabiletinen aıyrylǵan adamǵa 45 jylǵa deıin járdemaqy tólenedi
2022 jylǵy 20 mamyr 20:21

Jumys qabiletinen aıyrylǵan adamǵa 45 jylǵa deıin járdemaqy tólenedi

ÓSKEMEN. QazAqparat – Shyǵys Qazaqstan oblysynda 5 myńnan astam adam eńbekke qabiletinen aıyrylǵany úshin áleýmettik tólemaqy alady, dep habarlaıdy QazAqparat tilshisi.

ShQO aqparat ortalyǵynyń málimetine súıensek, azamat eńbekke qabiletinen aıyrylǵan jaǵdaıda áleýmettik tólemaqy beriledi.

Bul tólemaqy medıtsınalyq-áleýmettik saraptama eńbek etý qabiletinen aıyrylý dárejesin belgilegen kúnnen bastap taǵaıyndalady.

«Áleýmettik tólemniń mólsheri sońǵy 24 aıdaǵy kiristiń ortasha aılyq mólsherinen eń tómengi jalaqy kóleminiń 55 paıyzyn alyp, eńbekke qabiletten aıyrylýdyń tıisti koeffıtsıentterine kóbeıtý jolymen aıqyndalady. Tólemaqyny taǵaıyndaý týraly ótinish medıtsınalyq-áleýmettik saraptama bólimshesine jalpy eńbek etý qabiletinen aıyrylý dárejesi belgilengen kezde beriledi. Sonymen qatar qujattardy «Azamattarǵa arnalǵan úkimet» memlekettik korporatsııasynyń bólimshesine qaǵaz túrinde berýge bolady», - delingen aqparatta.

Tólemaqy resimdeýge qatysty SMS-habarlama uıaly telefonǵa kelip túsken kezde proaktıvti formatta taǵaıyndalýy múmkin.

Eńbekke qabiletten aıyrylý jaǵdaıyndaǵy áleýmettik tólemaqy birneshe jyl boıy tólenedi.

Mysaly, ol adam jumysqa qabiletin qalpyna keltirgenge deıin nemese zeınet jasyna jetkenge deıin berilýi múmkin (tólem uzaqtyǵy 45 jylǵa sozylýy múmkin). Bıyl bul tólemaqy mólsheri 9%-ǵa artty.

Aıta keteıik, Shyǵys Qazaqstanda bıyl 5179 adam eńbekke qabiletinen aıyrylǵany úshin tólemaqy alady.


Jańalyqtar

Úrdis

MURAǴAT