Qazaqstanda 83 iri kompanııaǵa tehnologııalyq aýdıt júrgizildi
2022 jylǵy 20 mamyr 12:57

Qazaqstanda 83 iri kompanııaǵa tehnologııalyq aýdıt júrgizildi

NUR-SULTAN. QazAqparat - Memleket basshysy Ekologııa, geologııa jáne tabıǵı resýrstar mınıstri Serikqalı Brekeshevti qabyldady, dep habarlaıdy QazAqparat Aqordanyń resmı saıtyna silteme jasap.

Prezıdentke mınıstrliktiń bıylǵy birinshi toqsanda atqarǵan qyzmetiniń negizgi qorytyndylary jáne aldaǵy kezeńge arnalǵan jospary jóninde esep berildi.

Atap aıtqanda, mınıstr elimizdiń ekologııalyq ahýalyn jaqsartý úshin qabyldanyp jatqan sharalar týraly baıandady.

Onyń aıtýynsha, jańa Ekologııalyq kodekstiń normalaryna sáıkes 83 iri kompanııaǵa tehnologııalyq aýdıt júrgizilgen. Bul olardyń 2025 jylǵa deıin jańa tehnologııaǵa kóshýge daıyndyǵyn baǵalaýǵa múmkindik berdi.

Qasym-Jomart Toqaevqa «Jasyl Qazaqstan» ulttyq jobasy men ekologııalyq problemalardy sheshýge baǵyttalǵan óńirlik Jol kartalarynyń júzege asyrylý barysy tanystyryldy.

Sonymen qatar Memleket basshysyna geologııalyq salanyń jaǵdaıy men Ulttyq geologııalyq qyzmetti qurý jumystary týraly baıandaldy.

Budan bólek Prezıdentke sý sharýashylyǵy ınfraqurylymynyń ahýaly, vegetatsııalyq kezeńdi ótkizý, jańa Sý kodeksi, sondaı-aq orman sharýashylyǵy men janýarlar áleminiń jaı-kúıi jóninde aqparat berildi.

Kezdesý sońynda Memleket basshysy mınıstrlikke ekologııalyq máselelerdi sheshý, sý sharýashylyǵy ınfraqurylymyn jaqsartý jáne geologııalyq salany damytý jóninde birqatar naqty mindet júktedi.


Uqsas jańalyqtar
Prezıdent Mádenıet jáne sport mınıstri Dáýren Abaevty qabyldady
2022 jylǵy 10 tamyz 14:47

Prezıdent Mádenıet jáne sport mınıstri Dáýren Abaevty qabyldady

NUR-SULTAN. QazAqparat - Memleket basshysy Mádenıet jáne sport mınıstri Dáýren Abaevty qabyldady, dep habarlaıdy QazAqparat Aqordanyń resmı saıtyna silteme jasap.

Qasym-Jomart Toqaevqa mınıstr ózi jetekshilik etetin barlyq salada atqarylyp jatqan jumystar týraly baıandady.

Dáýren Abaev azamattardyń jekelegen sanattarynyń kirisin arttyrý sharalary týraly aıtty. Atap aıtqanda bıyl mádenıet, óner jáne sport mekemeleri qyzmetkerleriniń jalaqysy ósken. Mınıstrlik Memleket basshysynyń tıisti tapsyrmalaryn oryndaý boıynsha jumysty jalǵastyrady.

Mádenıet jáne sport mınıstri kitap shyǵarý salasyndaǵy jaǵdaı týraly baıandady. Qazir negizgi kúsh baspa ónimderiniń, sonyń ishinde balalar ádebıetiniń básekege qabiletin arttyrýǵa, sondaı-aq jazýshylardy qoldaýǵa baǵyttalǵan. Sonymen qatar Prezıdentke muraǵat qoımalaryn jańǵyrtý men tsıfrlandyrý jaıy aıtyldy.

Qazaqstandyq sportshylardyń halyqaralyq iri jarystarǵa, 2024 jyly ótetin Olımpıada oıyndaryna daıyndyq máselesi de jeke qarastyryldy.

Memleket basshysy mınıstrlikke buqaralyq jáne balalar sportyn damytý, ulttyq mádenıetti keńinen nasıhattaý jóninde birqatar mindet júktedi.

Sonymen qatar Qasym-Jomart Toqaev týrıstik ınfraqurylymdy damytý men sheteldik ınvestorlardy tartý jáne birlesken týrıstik jobalardy iske qosý úshin qajetti jaǵdaı jasaýdyń mańyzdy ekenin atap ótti.


Foto: akorda.kz



Atyraýda aýa atmosferasynan zııandy zattar shoǵyry tabylmady
2022 jylǵy 10 tamyz 14:30

Atyraýda aýa atmosferasynan zııandy zattar shoǵyry tabylmady

ATYRAÝ. QazAqparat – Atyraý ekologtary aýa atmosferasynan zııandy zattar shoǵyryn tappady, dep habarlaıdy QazAqparat.

Oblystyq ekologııa departamentiniń zerthanalyq-taldamalyq baqylaý bóliminiń mamandary 9 tamyzda Atyraý qalasy aýmaǵynda tútinniń jaǵymsyz ıisine baılanysty birneshe núkteden aýadan synama alýǵa sheshim qabyldaǵan.

Proparka (AMÓZ), Hımıkter kenti (AMÓZ), №114 «Zagorodnaıa» (Atyraý-Oral tasjoly), №109 «Vostok» (Mahambet kóshesindegi Qurmanǵazy alańy) aýa sapasyn baqylaý stantsııalary mańynda, «Týhlaıa balka» býlaný alańy men Damby aýylynda atmosferalyq aýadan synama alý jumystary júrgizildi.

«Aýadan alynǵan synamany taldaýdyń nátıjesinde Proparka (AMÓZ) stantsııasynda kúkirtsýtegi 0,00141 mg/m3, Hımıkter kentindegi (AMÓZ) stantsııasynda kúkirtsýtegi 0,00144 mg/m3, №109 «Vostok» (Mahambet kóshesindegi Qurmanǵazy alańy) stantsııasynda kúkirtsýtegi 0.00112 mg/m3, №114 «Zagorodnaıa» (Atyraý-Oral tasjoly) stantsııasynda kúkirtsýtegi 0.00105 mg/m3, «Týhlaıa balka» býlaný alańynda kúkirtsýtegi 0,00117 mg/m3, Damby aýylynda kúkirtsýtegi 0,00012 mg/m3 kórsetti. Osy derekterden atmosferlyq aýada zııandy zattardyń ruqsat etilgen shekti shoǵyrlanýdan asý faktisi anyqtalmady», - dep habarlady departamenttiń baspasóz qyzmeti.

Eske sala ketelik, budan buryn Atyraýda shańnan tuman qalyptastyp, ekologtar aýadan synama alǵanyn, keıin shańdy tumanǵa baılanysty munaı zaýyty apattyq jaǵdaı bolmaǵanyn málimdegen edi.


Atyraýdaǵy shańdy tuman: Munaı zaýyty apattyq jaǵdaı bolmaǵanyn málimdedi
2022 jylǵy 10 tamyz 00:41

Atyraýdaǵy shańdy tuman: Munaı zaýyty apattyq jaǵdaı bolmaǵanyn málimdedi

ATYRAÝ. QazAqparat – Atyraý munaı óńdeý zaýytynda apattyq jaǵdaı tirkelmegen. Zaýyt shtattyq rejımde jumys istep tur, dep habarlaıdy QazAqparat.

9 tamyz kúni Facebook-te: «Úıińizge qońyraý shalyp, barlyq terezeni japtyryńyz, búkil otbasy múshesine úıde bolýǵa keńes berińiz. Dál qazir Atyraý MÓZ-inde gaz bulty shyǵyp jatyr. Jel kóterilip, ony tarqatyp jiberedi dep úmitteneıik! Eger sizde bas aýrýy, kózdiń, teriniń qyshýy, tynys alýdyń qıyndaýy sııaqty belgiler bolsa, habarlańyz. Úıge nemese Clinique baryńyz. Jaqyn arada basshylyqtan nusqaý alamyz» degen habar tarady.

Osyǵan baılanysty «AMÓZ» JShS-niń qoǵammen baılanys bólimi zaýyttyń shtattyq rejımde jumys istep turǵanyn málim etti.

«Zaýytta eshqandaı avarııalyq jaǵdaılar, atmosferaǵa shyǵaryndylar tirkelmegenin habarlaımyz. Búgingi jeldiń baǵyty – soltústik-shyǵystan. Jel Atyraý qalasynan soǵady. Bul qaladaǵy aýa jaǵdaıyna áser ete almaıdy. Demek, 9 tamyzda Atyraý qalasynda tútinniń paıda bolýyna AMÓZ-degi óndiristik protsess sebep bola almaıdy», -dep málimet taratty zaýyttyń qoǵammen baılanys bólimi.

Eske salaıyq, buǵan deıin Atyraýda shańnan tuman qalyptastyp, ekologtar aýadan synama alǵanyn jazǵan bolatynbyz.

«Búgin Atyraý qalasynda shań tárizdes tuman paıda boldy. Osyǵan baılanysty Atyraý oblysy boıynsha ekologııa departamentiniń zerthanalyq-taldamaly baqylaý bóliminiń mamandary atmosferalyq aýadan synama alý jumystaryn júrgizip jatyr. Synama jumystary Proparka, Hımıkter kenti, qalanyń oń jaq bóligindegi kárizdik tazartý qondyrǵysynan alyndy», -dep habarlady departamenttiń baspasóz qyzmeti.


Jańalyqtar

Úrdis

MURAǴAT