Atyraýda adam urlaý men zorlaýǵa qatysty qylmysty jasyrǵan polıtseıler sottaldy
2022 jylǵy 19 mamyr 19:54

Atyraýda adam urlaý men zorlaýǵa qatysty qylmysty jasyrǵan polıtseıler sottaldy

ATYRAÝ. QazAqparat – Atyraýda adam urlaý men zorlaýǵa qatysty qylmysty jasyrǵan polıtseıler sottaldy, dep habarlaıdy QazAqparat.

Búgin bul is Atyraý qalasynyń №2 sotynda qaraldy. Eki ýchaskelik polıtsııa ınspektoryna Qylmystyq kodekstiń 370-babynyń 2-bóliginiń 1) tarmaǵymen (Aýyr zardaptarǵa alyp kelgen qyzmettegi áreketsizdik), jedel ýákil men tergeýshige 433-baptyń 3-bóliginiń 1 jáne 2) tarmaǵymen (Aasa aýyr qylmysty jasyrýǵa ne aýyr zardaptarǵa ákep soqqan aldyn ala sóz baılasý arqyly adamdar toby jasaǵan qylmystyq quqyq buzýshylyqty jasyrý) aıyp taǵylǵan.

«Sot talqylaý kezinde mynadaı jaıt anyqtaldy. Jábirlenýshi D tanysy Ý-dyń ózin urlap, zorlap, úıine zańsyz kirgeni týraly polıtsııaǵa aryz túsirgen. Alaıda, ýchaskelik polıtsııa ınspektorlary A men K jábirlenýshi D.-nyń aryzyn qaramaı, ony jasyryp, K jalǵan hattama toltyrǵan. Inspektorlar qylmysty ashýǵa eshqandaı áreket jasamaı, ózderiniń jumystaryn jeńildetý maqsatynda qyzmettik áreketsizdik tanytqan. Jedel ýákil T jáne tergeýshi L jábirlenýshi D olardan kómek surap kelgenine qaramastan, ony urlap jáne zorlaǵany boıynsha shara qoldanbaı, jábirlenýshinin aldap, aýyr sanattaǵy eki qylmysty tirkeýden qasaqana jaltarǵan. Nátıjesinde Ý óziniń jazasyzdyǵyn sezinip, D-nyń densaýlyǵyna aýyr zııan kelýine, aýyr zardaptyń oryn alýyna jol bergen», - dep habarlady №2 sottyń baspasóz qyzmeti.

Sottalýshylardyń kinási jábirlenýshiniń, onyń ókiliniń, kýálerdiń aıǵaqtarymen, saraptamalar qorytyndylarymen, beınejazbalarmen dáleldendi. Prokýror sottalýshylar A men K-ny ómir boıyna, T men L-ny bes jyl merzimge quqyq qorǵaý organdarynda qyzmetpen aınalysý quqyǵynan, arnaıy ataǵynan aıyryp, barlyǵyna bas bostandyǵynan aıyrý túrindegi jaza taǵaıyndaýdy suraǵan. Al, sottalýshylar taǵylǵan aıyppen kelispeı, ózderin aqtaýdy suraǵan.

Sot A men K-nyń qylmystyq jaýaptylyǵy men jazasyn jeńildetetin mán-jaı retinde olardyń asyraýynda jas balalary baryn, sottalýshy L-nyń shynaıy ókingenin eskerdi. Sottalýshy T-da jazasyn jeńildetetin mán-jaılar anyqtalmady. Sottalýshylardyń qabyldaǵan antty buzýy jazany aýyrlatatyn jaǵdaı dep tanyldy.

«Sot úkimimen sottalýshylar A men K-ny ómir boıyna, T men L 5 jylǵa quqyq qorǵaý organdarynda qyzmetpen aınalysý quqyǵynan aıyryldy. L-ǵa - 3 jyl, A, K, T-ǵa 4 jyl merzimge bas bostandyǵynan aıyrý jazasy taǵaıyndaldy. Sottalýshylar arnaıy ataqtarynan aıyryldy. «Raqymshylyq jasaý týraly» Zańǵa sáıkes, T jáne L-ǵa taǵaıyndalǵan bas bostandyǵynan aıyrý jazasynyń merzimi úshten bir bóligine, ıaǵnı T-ǵa 1 jyl 4 aıǵa, L-ǵa 1 jylǵa qysqartyldy», -dep málim etti sottyń baspasóz qyzmetinen.

Sot úkimi zańdy kúshine engen joq.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT