Atyraý oblysyndaǵy 800 gektar jaıylym jýsan qurtynan zaqymdanǵan
2022 jylǵy 19 mamyr 00:35

Atyraý oblysyndaǵy 800 gektar jaıylym jýsan qurtynan zaqymdanǵan

ATYRAÝ. QazAqparat – Atyraý oblysynyń Qyzylqoǵa aýdanynda jýsan qurtynan 800 gektar jaıylym zaqymdanǵan, dep habarlaıdy QazAqparat.

Agroónerkásip keshenindegi memlekettik ınspektsııa komıteti Atyraý oblystyq aýmaqtyq ınspektsııasynyń bólim basshysy Ábıla Qazıevanyń aıtýynsha, 18 mamyrda zaqymdanǵan jaıylymǵa zertteý júrgizilgen.

«Qyzylqoǵa aýdanynda ár jyldary mundaı zııankes kezdesip júr. Alaıda, jaıylymǵa zııany tımegen edi. Al, bıyl 800 gektar jaıylymda jýsan jemiriniń dernásili ár túrli jas satysynda ekeni anyqtaldy. Máselen, Saǵyz aýyldyq okrýgindegi «Ánet», «Alyp Ana» sharýa qojalyqtarynyń árqaısysyna tıesili 200, «Toıı» sharýa qojalyǵynyń 100, Muqyr aýyldyq okrýginde tirkelgen «Qyzyl bulaq» sharýa qojalyǵynyń 100 gektar jaıylymy jýsan jemirinen zaqymdanǵany anyqtalyp otyr. Sondaı-aq «Saǵyz – Mııaly» baǵytyndaǵy joldyń boıynda ornalasqan Sarqýjaq ýchastoginde de 100 gektar jaıylymdyq jerge zııan kelgen», -dep habarlady Ábıla Qazıeva.

Onyń aıtýyna qaraǵanda, sharýa qojalyqtary osyndaın zııankesterge qarsy kúres sharalaryn óz qarajaty esebinen júrgizýi kerek.

«Qazir osyǵan baılanysty jergilikti atqarýshy organnyń ókilderi túsinik jumystaryn júrgizip jatyr. Mundaı zııakesterge qarsy hımııalyq óńdeý jumystaryn júrgizetin mekemelerden baǵa usynymdary alyndy. Aýyl sharýashylyǵy baǵytyndaǵy jerge júrgiziletin hımııalyq óńdeý jumystarynyń esebi jasalyp, oblystyq aýyl sharýashylyǵy basqarmasyna berildi», -dep málim etti Ábıla Qazıeva.

Eske sala ketelik, budan buryn Atyraý oblysynda 211 jylqynyń qandaı aýrýǵa shaldyqqany anyqtalǵanyn jazǵan edik.


Uqsas jańalyqtar
Jetisý: Qaratal aýdanynda paıdalanylmaı jatqan jerler memleketke qaıtarylady
2022 jylǵy 5 tamyz 19:36

Jetisý: Qaratal aýdanynda paıdalanylmaı jatqan jerler memleketke qaıtarylady

NUR-SULTAN. QazAqparat – Jetisý oblysy Qaratal aýdanynda iri jer ıelenýshilerdiń paıdalanylmaı jatqan jerleri memleketke qaıtarylady, dep habarlaıdy Jetisý oblysy ákimdiginiń baspasóz qyzmeti.

Qaratal aýdany turǵyndarynyń oblys basshysymen kezdesýi kezinde kótergen máselesiniń biri – jaıylymdyq jer jetispeýshiligi. Osyǵan baılanysty Jetisý oblysynyń ákimi Beıbit Isabaev aýdannyń birshama aýyl sharýashylyǵy jerleri iri jer ıelenýshilerdiń qolynda bolyp kelgenin ashyp aıtty.

Solardyń qatarynda «Shyǵys Qaratal», «Baqyt Qaratal», «Úshtóbe», «Opytnoe», «Tekeli» seriktestikteri men basqa da birqatar sharýashylyqtar bar, - dep habarlaıdy Jetisý oblysy ákiminiń baspasóz qyzmeti.

Máselen, aeroǵaryshtyq zertteýlerdiń derekterine sáıkes Qaratal aýdanynda paıdalanylmaı jatqan 804 ga egistik, 74,8 myń ga jaıylym jer anyqtalǵan. Jergilikti ákimdik tarapynan atalǵan jerlerdi aınalymǵa tartýǵa baǵyttalǵan eshbir shara qabyldanbaǵan. Osy rette oblys basshysy paıdalanylmaǵan alqaptardy qaıtaryp, jerdi maqsatty ıgere alatyn azamattarǵa berý kerektigin qadap aıtty.

«Bul máseleni qaǵaz júzinde qaldyrmaı, kabınette otyrmaı, aýyldarǵa baryp kórińiz. Aýdan ákimdigi bul jaǵynan mandytyp jumys júrgizbegen. Bulaı bolmaıdy!», - dedi ol.
Bul rette aýdan ákimdigine tıisti sala mamandarymen jáne quqyq qorǵaý organdarymen birlesip, ıgerilmeı otyrǵan aýyl sharýashylyǵy jerlerin memleketke qaıtarý sharalaryn shuǵyl qolǵa alýdy tapsyrdy. Іri jer ıelenýshilerdiń jıynǵa qatysqan ókilderine de bul másele basty nazarda bolatynyn eskertti.


Aýyl sharýashylyǵy mınıstrligi atqarylyp jatqan jumysty durys túsindirmeıdi – Smaıylov
2022 jylǵy 5 tamyz 12:23

Aýyl sharýashylyǵy mınıstrligi atqarylyp jatqan jumysty durys túsindirmeıdi – Smaıylov

NUR-SULTAN. QazAqparat – Aýyl sharýashylyǵy mınıstrligi atqarylyp jatqan jumysty durys túsindirmeıdi. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat.

Rrimeminister.kz saıtynda málim etilgendeı, búgin Úkimet basshysy beınekonferentsııa rejıminde jeke bıznes ókilderiniń, «Atameken» UKP jáne ortalyq memlekettik organdar basshylarynyń qatysýymen Otandyq kásipkerler keńesiniń kezekti otyrysyn ótkizdi.

Otyrysqa qatysýshylar Úkimettiń orta merzimdi kezeńge arnalǵan jańa ekonomıkalyq saıasatynyń jobasyn qarady. Ol edáýir ekonomıkalyq erkindikti qamtamasyz etýdi, ekonomıkany ártaraptandyrýdy, eksporttyq áleýetti jáne eńbek ónimdiligin arttyrýdy, makroekonomıkalyq turaqtylyqty qamtamasyz etýdi, densaýlyq saqtaý, bilim berý jáne áleýmettik qorǵaýdy damytýdy kózdeıdi.

«Biz úshin ekonomıkalyq ósimniń arqasynda azamattardyń ál-aýqatynyń artýy, tabysynyń ósýi mańyzdy. Bul oraıda ekonomıkalyq ósý turaqty bolýy kerek. Osyǵan baılanysty, birinshi kezekte kásipkerlikti damytýǵa basa nazar aýdarǵymyz keledi. Sonymen qatar barlyq basqa salalar da qurylymdalyp, osy qujatta kórsetilgen. Eger bıznes ókilderiniń naqty usynystary bolsa, olardy eskerýge daıynbyz», — dedi Premer-Mınıstr.

Sondaı-aq ol bıznes-qaýymdastyq pen azamattyq qoǵamdy talqylaýǵa belsendi túrde qatysýǵa shaqyrdy.

Sonymen qatar otyrysta agroónerkásip keshenin, taý-ken metallýrgııasyn, kólik salasyn, energetıkany jáne salyqtyq ákimshilendirýdi damytý máseleleri qaraldy.

Atap aıtqanda, bıznestiń problemalyq máselelerin «EPG Education» JShS dırektory Dosym Besbaı, «Olja Agro» JShS dırektory Aıdarbek Qojanazarov, «Atameken» UKP tóralqasynyń Geologııa salasy, taý-ken, kómir óndirý jáne metallýrgııa ónerkásibi komıtetiniń tóraǵasy Nıkolaı Radostovets jáne «Vızor Qazaqstan» ınvestıtsııalyq kompanııasynyń seriktesi Almas Chýkın kóterdi.

Aýyl sharýashylyǵyn retteý máselelerin talqylaý aıasynda Premer-Mınıstr salalyq mınıstrlik tarapynan jiberilgen kemshilikterge nazar aýdardy.

«Aýyl sharýashylyǵy mınıstrligi atqarylyp jatqan jumysty durys túsindirmeıdi. Sondyqtan kásipkerlerde ne bolyp jatqany týraly qate túsinik qalyptasady. Bıdaıdy shyǵarýǵa eshqandaı tyıym salynǵan joq! Biz kvota túrinde shekteýler engizdik, biraq ony ádettegi eksport kóleminen joǵary qoıdyq», — dedi Álıhan Smaıylov.

Úkimet basshysynyń aıtýynsha, eger Qazaqstan aıyna shamamen 350 myń tonna astyq eksporttap otyrǵan bolsa, kvota bıylǵy qyrkúıek aıynyń sońyna deıin qoldanystaǵy eksporttyq kelisimsharttardy shektemeı, azyqtyq astyqty baqylaýsyz jappaı shyǵarýdyń aldyn alýdy qamtamasyz etý úshin aıyna 500 myń tonnadan joǵary deńgeıde belgilendi.

Sondaı-aq Álıhan Smaıylov AÓK sýbsıdııalaý júıesin reformalaý taqyrybyn qozǵady.

«Biz barlyq bıýdjet shyǵystaryn olardyń tıimdiligin arttyrý bóliginde, onyń ishinde aýyl sharýashylyǵy salasy boıynsha qaıta qarap jatyrmyz. Qarjyny aýyl sharýashylyǵy taýar óndirýshilerin yntalandyrýǵa baǵyttaǵymyz keledi. Bul ınvestıtsııalyq sýbsıdııalar, nesıeler boıynsha paıyzdyq mólsherlemeni arzandatý, olardy odan da qoljetimdi etkimiz keledi. Aýyl sharýashylyǵyn qarjylandyrýdy qysqartqymyz joq. Kerisinshe, ony ulǵaıtqymyz keledi. Alaıda odan ekonomıka úshin, jalpy el úshin paıda bolýy kerek, árbir bıýdjettik teńgeniń qaıtarymyn arttyrǵymyz keledi», — dedi Premer-Mınıstr.

Otyrysty qorytyndylaı kele, Álıhan Smaıylov barlyq qatysýshylarǵa aıtylǵan eskertýler men usynystar úshin alǵys aıtty.

«Biz birlesip alǵa jyljýymyz kerek. Qandaı da bir syndarly usynystar bolsa, olarǵa árqashan qulaq asyp, óz jumysymyzda eskeretin bolamyz. Barlyq josparlanǵan ózgeristerdi júzege asyrýda bızneske jetekshi ról beriletinin taǵy da rastaǵym keledi. Úkimet kásipkerlik qoǵamdastyǵymen birlesip, bıznesti júrgizý jaǵdaıyn jaqsartýdy jáne elimizdiń ekonomıkasynyń ósýi men damýy, azamattardyń ál-aýqatyn arttyrý úshin alǵysharttar jasaýdy jalǵastyrady», — dep túıindedi Premer-Mınıstr.

Eske salaıyq, Prezıdent Qasym-Jomart Toqaev Aýyl sharýashylyǵy mınıstri Erbol Qarashókeevke sógis jarııalaǵan bolatyn.





Atyraý oblysynda 223 800 tonna qysqy mal azyǵy daıyndaldy
2022 jylǵy 5 tamyz 00:02

Atyraý oblysynda 223 800 tonna qysqy mal azyǵy daıyndaldy

ATYRAÝ. QazAqparat –Atyraý oblysynda 223 800 tonna qysqy mal azyǵy daıyndaldy. Bul qajetti mal azyǵynyń 40,5 paıyzyn quraıdy, dep habarlaıdy QazAqparat.

Oblystyq aýyl sharýashylyǵy basqarmasy basshysynyń orynbasary Baǵdat Rústemovtiń málimetine súıensek, bıyl 553 myń tonnadan astam mal azyǵyn daıyndaý josparlanyp otyr.

«Bizdiń oblysta 194 413 múıizdi iri qara, 600 477 qoı jáne 103 355 jylqy bar. Byltyr osynsha maldy qysqy mal azyǵymen qamtý úshin 563 myń tonna shóp daıyndalǵan edi. Al, bıyl 553 myń tonna mal azyǵyn daıyndaý kózdelip otyr. Osy kezge deıin 223 myń 800 tonnasy daıyndaldy. Qazir pishen daıyndaý jumystaryna 1 769 adam men 604 traktor, 158 júk kóligi, 401 tirkeme, 296 shóp shapqysh, 178 shóp taılaǵysh tehnıka tartyldy», -deıdi Baǵdat Rústemov.

Onyń deregine qaraǵanda, mal azyǵynyń baǵasyn turaqtandyrý maqsatynda oblys ákimdigi men «Karat» JShS arasynda memorandýmǵa qol qoıylǵan. Qazir memorandýmǵa sáıkes aýyl sharýashylyǵy ónimderin tıimdi baǵamen satylyp jatyr. Máselen, Atyraý qalasy men aýdandarda jem kebeginiń 1 kelisi 75-80 teńge turady. Qurama jem Batys Qazaqstan jáne Aqtóbe oblystarynan tasymaldanyp jatyr.

Al, aýdandarda 1 rýlon shóptiń baǵasy tasymaldaý shyǵynyna baılanysty ártúrli bolyp otyr. Máselen, Qyzylqoǵa, Qurmanǵazy aýdandarynda – 6 myń, Inder, Isataı, Mahambet, Jylyoı, Maqat aýdandarynda 8-12 myń teńgeni quraıdy.

Eske sala ketelik, budan buryn atyraýlyq jalbyz ben jaýynqurt ósirýden tabys taýyp otyrǵanyn jazǵan edik.


Jańalyqtar

Úrdis

MURAǴAT