شاڭحايدا تىرشىلىك قايتا جانداندى
18 مامىر 08:43

شاڭحايدا تىرشىلىك قايتا جانداندى

نۇر- سۇلتان. قازاقپارات - شاڭحايدا تىرشىلىك قايتا جانداندى. تۇرعىندار دۇكەن، شاشتارازعا بارا الاتىن بولدى. قالعان نىساندار ماۋسىم ايىندا اشىلادى. ال لوكداۋن الىپ شاھارمەن قاتار بۇكىل قىتاي ەكونوميكاسىنا كەرى اسەرىن تيگىزدى.

ءوندىرىس، قىزمەت كورسەتۋ جانە ساۋدا كورسەتكىشتەرى تومەندەپ، جۇمىسسىزدار سانى ءوستى. شانحايدا ءۇش كۇن بويى كارانتين ايماقتارىنان تىس اۋماقتا كوۆيد دەرتى جۇقتىرۋ تىركەلگەن جوق. ەكى اي بويى ۆيرۋسپەن قاتال كۇرەس جۇرگىزگەن الىپ شاھار قالىپتى ومىرگە كەلە باستادى. كەيبىر دۇكەندەر، ءدارىحانالار مەن شاشتارازدار اشىلدى. ءبىراق ولار ازىرگە شەكتەۋلى تارتىپپەن جۇمىس ىستەيدى.

جاقىن ارادا مەترو دا اشىلادى. دەگەنمەن، ءبىر ميلليونعا جۋىق ادام ءالى دە كارانتيندە وتىر.

جاو داندان، شاڭحاي دەنساۋلىق ساقتاۋ كوميتەتى باسشىسىنىڭ ورىنباسارى:

- انىقتالعان 77 ناۋقاستىڭ 31- ءى كارانتينگە ورنالاستىرىلعاندار. سونداي- اق كارانتين اۋماعىندا اۋرۋ بەلگىلەرى بايقالمايتىن 746 ۆيرۋس تاسىمالداۋشى انىقتالدى. بۇگىنگى تاڭدا قالانىڭ بارلىق 16 اكىمشىلىك اۋدانىندا اۋرۋدى جۇقتىرۋ تىركەلگەن جوق.

ءساۋىر ايىندا شاڭحايدا ءبىر دە ءبىر كولىك ساتىلعان جوق. ال بۇعان دەيىن ايىنا شامامەن 30 مىڭعا جۋىق كولىك ساتىلاتىن. پۋدۋن اۋەجايىنداعى جولاۋشىلار سانى % 99- كە ازايدى. ىندەتتىڭ ءورشۋى بۇكىل قىتاي ەكونوميكاسىنا اسەر ەتتى.

فۋ لينحۋەي، ق ح ر مەملەكەتتىك ستاتيستيگى:

- ىندەت ءساۋىر ايىندا ەكونوميكاعا كەرى اسەرىن تيگىزدى. ءىرى ونەركاسىپتە قوسىلعان قۇننىڭ ءوسۋ قارقىنى % 2,9- كە، قىزمەت كورسەتۋ سالاسىنداعى ءوندىرىس يندەكسى% 6,1- كە، تۇتىنۋ تاۋارلارىنىڭ ساۋداسى % 11,1- كە تومەندەدى. جالپى بۇل پاندەميا اسەرىنەن تۋىنداعان قىسقا مەرزىمدى وزگەرىستەر. قازىر قىتاي ەكونوميكاسى تۇراقتى دامىپ كەلەدى، ۇزاق مەرزىمدى ءۇردىسى وزگەرگەن جوق. كارانتينگە بايلانىستى مەيرامحانا سالاسىنىڭ تابىسى 25 پروتسەنتكە ازايعان. ال جۇمىسسىزدىق دەڭگەيى سوڭعى ەكى جىلداعى ەڭ جوعارى كورسەتكىشكە جەتىپ، %6- تەن اسىپ كەتتى.

ەكونوميستەر مامىر ايىندا جاعدايدىڭ جاقسارۋىن بولجاپ وتىر. ويتكەنى ساۋىردە سارى جانە قىزىل ايماقتاردا بولعان 64 قالا ەلدىڭ جالپى ىشكى ءونىمىنىڭ %35- ءىن وندىرەدى.

www.24.kz

جاڭالىقتار