Balalar jylynda 2,3 mln oqýshy jazǵy lagerde demalady
2022 jylǵy 17 mamyr 21:53

Balalar jylynda 2,3 mln oqýshy jazǵy lagerde demalady

NUR-SULTAN. QazAqparat - QR Premer-Mınıstriniń orynbasary Eraly Toǵjanovtyń tóraǵalyǵymen Balalar jyly aıasynda júzege asyrylatyn is-sharalar boıynsha keńes ótti, sondaı-aq jazǵy demalysty uıymdastyrý men balalardyń quqyqtaryn qorǵaý máseleleri qaraldy, dep habarlaıdy primeminister.kz.

Keńeske memlekettik jáne jergilikti atqarýshy organdardyń ókilderi qatysty.

Bilim jáne ǵylym vıtse-mınıstri Ǵanı Beısembaev apatty jáne úsh aýysymdy mektepter problemasyn sheshý men oqýshy oryndarynyń tapshylyǵyn joıý úshin 2022 jyly maqsatty qurylys esebinen jańa mektepterdi iske qosý josparlanǵanyn atap ótti.

Jyl saıyn balalardy jazǵy demalyspen qamtý kórsetkishi artady.

Jazǵy demalys kezinde balalardy saýyqtyrý lagerlerinde 2,3 mln qazaqstandyq oqýshy demalady. Bul ótken jylmen salystyrǵanda jarty mıllıonǵa kóp.

Sondaı-aq bıyl saýyqtyrý lagerleri men alańdarynyń sany aıtarlyqtaı ósti.

Jalpy respýblıka boıynsha 11 myńnan astam mektep janyndaǵy, qala syrtyndaǵy, shatyrly, sporttyq, kıiz úı lagerleri jumys jasaıdy.

Al kúzge qaraı qazaqstandyq joǵary oqý oryndaryna túsý úshin grant sany 73 myńǵa deıin artady.

Óz kezeginde vıtse-premer Densaýlyq saqtaý mınıstrligine balalar lagerlerinde sanıtarııalyq-epıdemıologııalyq talaptardyń saqtalýyn qamtamasyz etýdi tapsyrdy, balalardyń densaýlyǵy men qaýipsizdigi eń basty mindet ekenin atap ótti.

Budan ári Mádenıet jáne sport vıtse-mınıstri Nurǵısa Dáýeshov vedomstvo jelisi boıynsha 9 is-shara kózdelgenin, onyń beseýi 1 mln astam balany qamtı otyryp ótkizilgenin habarlady.

Bıylǵy jyldyń ekinshi jartyjyldyǵynda qalǵan 4 jobany iske asyrý josparlanǵan.

Sondaı-aq onyń aıtýynsha, mınıstrlik jergilikti atqarýshy organdarmen birlesip, sport ınfraqurylymyn damytýdyń jospar-kestesiniń jobasyn ázirledi, oǵan 113 jańa nysan salý, 21 nysandy jańǵyrtý jáne 6 iri nysandy qosymsha jaraqtandyrý jumystary kiredi.

Eraly Toǵjanov eldiń erteńi balalardyń búgingi jaǵdaıyna baılanysty ekendigin taǵy da eske saldy.

Osyǵan baılanysty vıtse-premer barlyq ýákiletti organdarǵa balalar jylyn ótkizý boıynsha jumysty kúsheıtýdi tapsyrdy.

Jergilikti atqarýshy organdarǵa óńirlerde mektep salý isin jedeldetý qajettigin eskertti.


Seriktester jańalyqtary

Jańalyqtar

Úrdis

MURAǴAT