Qazaqstan jol sapasy jaǵynan álemde 93-shi orynda tur – Úkimet
2022 jylǵy 17 mamyr 13:26

Qazaqstan jol sapasy jaǵynan álemde 93-shi orynda tur – Úkimet

NUR-SULTAN. QazAqparat – 2022 jyly respýblıkalyq mańyzy bar joldardyń 91% jáne jergilikti joldardyń 85% normatıvtik jaǵdaıǵa keltirý josparlanǵan. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat.

«Qazaqstandaǵy avtomobıl joldary jelisiniń jalpy uzyndyǵy shamamen 96 myń shaqyrym. Jol kólik qatynasyn damytý úshin sońǵy jyldary aýqymdy jumys atqaryldy. «Batys Eýropa – Batys Qytaı» kólik dáliziniń qurylysy boıynsha joba iske asyryldy. 2 myń shaqyrymnan astam jol aqyly júıege kóshti. Bul – jol ınfraqurylymyn ózin-ózi qamtamasyz etý boıynsha halyqaralyq ozyq tájirıbe», - dep atap ótti Premer Úkimet otyrysynda.

Degenmen Úkimet basshysy aqyly júıege aýysyp jatqan joldardyń jaǵdaıyna qatysty halyqtyń shaǵymy da bar ekenin aıtty. Sondyqtan «QazAvtoJol» kompanııasy joldardy kútip-ustaý sapasy men qaýipsizdigi boıynsha jumysty kúsheıtýi qajet.

«Jalpy avtojoldardy damytý «Qýatty óńirler – el damýynyń draıveri» atty ulttyq jobasy aıasynda júzege asýda. Ulttyq jobaǵa sáıkes, 2022 jyly respýblıkalyq mańyzy bar joldardyń 91% jáne jergilikti joldardyń 85% normatıvtik jaǵdaıǵa keltirý josparlanǵan. Ol úshin jalpy uzyndyǵy 4,3 myń shaqyrym avtojoldy qaıta jańǵyrtý jáne jańa joldar salý boıynsha iri jobalar iske asady», - dedi Álıhan Smaıylov.

Sonymen qatar jol boıyndaǵy 1110 qyzmet kórsetý nysanyn tıisti standartarǵa sáıkestendirý jumystary júredi. Bul rette qabyldanyp jatqan sharalarǵa qaramastan, birqatar problemalyq máseleler bar. Onyń eń negizgisi – joldardyń, ásirese, jergilikti jerdegi joldardyń nasharlyǵy.

«Dúnıejúzilik ekonomıkalyq forýmnyń derekteri boıynsha, Qazaqstan jol sapasy jaǵynan álemde 93-shi orynda. Memleket basshysy Qasym-Jomart Toqaev joldardyń nashar jaǵdaıyn birneshe ret aıtty. Árbir ákim óńirdegi joldardyń jaı-kúıine tikeleı jaýapty ekenin atap ótkim keledi. Buǵan qosa, bilikti kadrlar jetispeıdi. Jol-kólik ınfraqurylymyn jobalaý jáne salý kezinde jańa qurylys materıaldary men zamanaýı tehnologııalar az qoldanylady. Bul joldardyń sapasy men olardy jóndeý jáne salý merzimine de áser etedi. Indýstrııa mınıstrligi osy máselelerdi pysyqtaýy qajet», - dedi Premer-Mınıstr.


Uqsas jańalyqtar

Jańalyqtar

Úrdis

MURAǴAT