Aýyldyq okrýgterdiń veterınarııalyq dárigerlerine qosymsha ókilettikter berilmek
2022 jylǵy 17 mamyr 10:35

Aýyldyq okrýgterdiń veterınarııalyq dárigerlerine qosymsha ókilettikter berilmek

NUR-SULTAN. QazAqparat – Mal sharýashylyǵy salasynda bilikti mamandar jetispeıdi. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Taǵy bir másele – mamandardyń tapshylyǵy. Qazirgi ýaqytta jergilikti jerlerde veterınarlardan basqa, zootehnık-tehnologtar men zootehnık-selektsıonerlerdiń jetispeýshiligi baıqalady. Ásirese, óndiristik qus sharýashylyǵynda kadrlyq qamtamasyz etý boıynsha kúrdeli jaǵdaı baıqalady. Sonymen qatar, jas mamandardy jergilikti jerlerge bekitý máselesi ótkir kúıinde qalyp otyr», - dedi mınıstr.

Degenmen, onyń aıtýynsha, qazirgi ýaqytta mal sharýashylyǵyna veterınarlyq qyzmet kórsetýdi jaqsartý boıynsha is-sharalar qabyldanyp jatyr.

«Ortalyq jáne jergilikti atqarýshy organdardyń veterınarııalyq qyzmetteri arasynda ókilettikterdi bólý, veterınarııalyq qyzmetti ózine tán emes fýnktsııalardan bosatý, aýyldyq okrýgterdiń veterınarııalyq dárigerlerine qosymsha ókilettikter berý, sondaı-aq veterınarııa salasyn tsıfrlandyrý boıynsha usynystar ázirlendi. Qazirgi ýaqytta mal sharýashylyǵy salasyndaǵy jaǵdaıdy ózgertý jáne onyń damý turaqtylyǵyn arttyrý maqsatynda mınıstrlik naqty is-sharalar qabyldaýda», - dedi Erbol Qarashókeev.

Mınıstrdiń atap ótýinshe, bul is-sharalardyń barlyǵy «Veterınarııa týraly» Zańǵa tıisti ózgerister men tolyqtyrýlar engizý arqyly zańnamalyq deńgeıde nyǵaıtylatyn bolady.

«Bul zań jobasy osy jyly Parlamentke engiziledi. Aldaǵy ýaqytta memlekettik monopolııadan barynsha bas tartý jáne sol arqyly veterınarııa salasyna jeke ınvestıtsııalardyń kelýine jol ashý kózdeledi», - dedi ol.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT