Jyl bastalǵaly 25 adam sýǵa ketti – TJM
2022 jylǵy 16 mamyr 13:41

Jyl bastalǵaly 25 adam sýǵa ketti – TJM

NUR-SULTAN. QazAqparat – Bıyl 25 adamnyń ajaly sýdan keldi. Odan bólek, 7 adam qutqaryldy, onyń 2-eýi — bala. Bul týraly QR TJM Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov málim etti, dep habarlaıdy QazAqparat tilshisi.

«Adamdardyń sýǵa ketýine jol bermeý jáne aldyn alý maqsatynda bizdiń mınıstrlik Іshki ister mınıstrligi, óńirlik ákimdikter jáne eriktilermen birlesip, shomylýǵa tyıym salynǵan oryndarda reıdter men patrýldeý jumysyn turaqty júrgizip keledi. Osy kúnge deıin atalǵan sharaǵa 36 929 adam jumyldyrylyp, 17 620 patrýldik jáne reıdtik is-shara ótti. Onyń nátıjesinde 118 azamat ákimshilik jaýapkershilikke tartyldy. Sonymen qatar aldyn alý jumystary aıasynda elimizdiń sý aıdyndarynda 7 adam sýdan qutqaryldy, onyń 2-eýi — bala», - dedi Baýyrjan Syzdyqov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, azamattardyń sýdaǵy qaýipsizdigi máselesi quzyrly organdardyń turaqty nazarynda.

«Ókinishke qaraı, qaıǵyly oqıǵalar bar. Bıyl da sýdaǵy qaýipsizdik erejelerin saqtamaý saldarynan adamdardyń qaza bolý faktileri tirkelip otyr. Atap aıtqanda, jyl basynan beri 25 adam sýǵa ketti, onyń 3-eýi — bala», - deıdi ol.

Buǵan deıin elimiz boıynsha sýǵa shomylýǵa ruqsat berilgen 490 orynnyń baryn habarladyq .

Sondaı-aq, endigi ýaqytta qazaqstandyqtar shomylýǵa bolatyn oryndardy mobıldi qosymsha arqyly bile alady.


Uqsas jańalyqtar
Túrkistan oblysynda 15 jasar bala Arys ózenine batyp ketti
2022 jylǵy 8 tamyz 18:40

Túrkistan oblysynda 15 jasar bala Arys ózenine batyp ketti

TÚRKІSTAN. QazAqparat - Arys ózeniniń boıyndaǵy shomylýǵa tyıym salynǵan aımaqta sýǵa túsken bala qaza tapty, dep habarlaıdy QazAqparat tilshisi.

Oqıǵa Ordabasy aýdany Temirlan aýylynan bir shaqyrym jerdegi Arys ózeniniń boıynda bolǵan.

2007 jyly týǵan jasóspirim otbasymen demalys ótkizý kezinde shomylýǵa tyıym salynǵan orynda sýǵa túsip, qaıtadan shyqpaǵan.

«Túrkistan oblysy tótenshe jaǵdaılar departamentiniń jedel-qutqarý jasaǵyna qarasty qutqarýshylar men súńgýirler balanyń máıitin sýdan alyp shyqty. Oqıǵa ornyndaǵy balany izdeý jumysyna Túrkistan oblysy TJD 2 qyzmetkeri men bir tehnıkasy jáne jedel qutqarý jasaǵynyń 5 qutqarýshysy, polıtsııa departamentiniń 4 qyzmetkeri jumyldyryldy» - delingen Túrkistan oblysy TJD baspasóz qyzmeti taratqan habarlamada.



SQO jaǵajaılarynda ishimdik ishkenderge 300-den astam aıyppul salyndy
2022 jylǵy 5 tamyz 14:39

SQO jaǵajaılarynda ishimdik ishkenderge 300-den astam aıyppul salyndy

PETROPAVL. QazAqparat – Soltústik Qazaqstan oblysynda sýda bolatyn oqys oqıǵalardyń aldyn alý úshin qutqarýshylar bıyl 7 myńnan astam reıd ótkizdi. Jaǵajaıda spırttik ishimdik ishkenderge 316 hattama toltyryldy, dep habarlaıdy QazAqparat tilshisi.

SQO tótenshe jaǵdaılar departamenti azamattyq qorǵanys basqarmasynyń bastyǵy Marat Muratovtyń aıtýynsha, jyl basynan beri óńirde 5 adamnyń ajaly sýdan bolsa, sonyń bireýi – bala. 31 adam qutqaryldy. Byltyr sýǵa ketken 22 adamnyń altaýy bala.

Keshe Petropavl mańyndaǵy Pestroe kólinde 25 jastaǵy jigit sýǵa batyp ketti. Olar qalalyq jaǵajaıdan bólek, arnaıy jaraqtandyrylmaǵan jerde shomylǵan. Kólde kezekshilik etip júrgen qutqarýshylar qaıyqpen baryp, munyń qaýipti ekenin aıtyp eskertkenimen, jastar demalysty jalǵastyrǵan.

«Jastar katamarandy jalǵa alyp, júzgen. Jaǵadan shamamen 8 metrge alystap ketken. Ol jerde kóldiń tereńdigi 2,5-3 metrge jetedi. Osylaısha 25 jastaǵy jigit katamarannan qulap ketken. Alǵashynda ony qasynda bolǵan dostary qutqarmaq boldy. Biraq esh nátıje shyqpaǵan soń ǵana qutqarýshylardy shaqyrypty. Sondyqtan olar kesh jetken. Sýdan jigittiń denesin alyp shyǵyp, alǵashqy medıtsınalyq kómekti kórsetkenmen esh nátıje shyqpady. Oqıǵa ornyna shaqyrtylǵan jedel járdem de jigitti aman alyp qala almady», - deıdi Marat Muratov.

Mamannyń aıtýynsha, óńirde sýǵa batqan adamdardyń barlyǵy arnaıy jaraqtandyrylmaǵan jerde sýǵa shomylǵan. Osyndaı qaıǵyly jaıttardyń aldyn alý úshin jyl basynan beri qutqarýshylardyń, polıtseıler men volonterlerdiń kómegimen 7 myńnan astam reıd júrgizilgen. Nátıjesinde sýdy ortaq paıdalaný erejelerin buzǵan, ıaǵnı 324 bap boıynsha 527 hattama toltyrylǵan, al 440-bap – «spırttik ishimdik ishý» boıynsha 316 hattama toltyrylyp, aıyppul salyndy.


Astanada sýǵa ketkenderdiń 80%-y – ishimdik ishkender men jabdyqtalmaǵan jerde shomylǵandar
2022 jylǵy 4 tamyz 18:15

Astanada sýǵa ketkenderdiń 80%-y – ishimdik ishkender men jabdyqtalmaǵan jerde shomylǵandar

NUR-SULTAN. QazAqparat – Bas shahardyń Tótenshe jaǵdaılar departamenti elordalyqtardy sýǵa shomylý kezinde qaýipsizdik erejelerin qatań saqtaýǵa úndedi, dep habarlaıdy QazAqparat tilshisi.

«Statıstıkaǵa sáıkes, sýǵa ketip qaza bolǵandardyń 80 paıyzy jabdyqtalmaǵan oryndarda shomylǵandar men alkogoldik ishimdik ishkender. Osyǵan baılanysty Tótenshe jaǵdaılar departamenti sýǵa shomylý kezinde qaýipsizdik erejelerin qatań saqtaýǵa shaqyrady», - dep málim etti departament ókilderi.

Vedomstvo arnaıy jabdyqtalǵan Ortalyq jaǵajaı, «Trı peskarıa» jáne «Astanalyq aýla» demalys oryndarynda shomylýǵa bolatynyn eske saldy.

Quzyrly organ sýǵa mas kúıde shomylmaýdy, qaıyqtar men katerlerdiń mańaıyna barmaýdy, olardan sekirmeýdi jáne balalardy eresekterdiń qaraýynsyz qaldyrmaýdy eskertedi.

Buryn habarlaǵanymyzdaı, Aqtaýdan 43 shaqyrym jerdegi «Dýnga» munaı ken ornynyń sorǵy stantsııasy aýmaǵynda úsh adam sýǵa batyp ketti.


Jańalyqtar

Úrdis

MURAǴAT