Qazaqstanda apta ishinde bolǵan kadrlyq taǵaıyndaýlar
2022 jylǵy 15 mamyr 11:19

Qazaqstanda apta ishinde bolǵan kadrlyq taǵaıyndaýlar

NUR-SULTAN. QazAqparat – Ótken aptada merekelik demalystar boldy, áıtse de elorda men óńirlerde birqatar kadrlyq aýys-túıis boldy, dep habarlaıdy QazAqparat tilshisi.

Apta basynda «Damý» kásipkerlikti damytý qory» AQ dırektorlar keńesiniń tóraǵasy bolyp Erulan Jamaýbaev saılandy. Bul qyzmetke ol Premer-Mınıstrdiń orynbasary – Saýda jáne ıntegratsııa mınıstri Baqyt Sultanovtyń ornyna keldi.

Jamaýbaev Erulan Kenjebekuly 1974 jyly 25 naýryzda dúnıege kelgen. 1995 jyly Qazaq memlekettik basqarý akademııasyn «qarjy jáne nesıe» mamandyǵy boıynsha, 2009 jyly T. Rysqulov atyndaǵy Qazaq ekonomıkalyq ýnıversıteti janyndaǵy «strategııalyq menedjment» mamandyǵy boıynsha Halyqaralyq bıznes mektebin bitirgen. Sondaı-aq, halyqaralyq qarjy uıymdarynda jáne Batys elderiniń ortalyq (ulttyq) bankterinde makroekonomıkalyq jáne qarjylyq saıasat, aqsha-nesıe saıasatynyń strategııasy jáne ony Eýropalyq ortalyq bankte júzege asyrý erekshelikteri, makroekonomıkalyq menedjment, qarjylyq naryqtyq quraldar, qarjylyq turaqtylyq baǵyttary boıynsha biliktilikti arttyrý kýrstarynan (tájirıbeden) ótti.

Eńbek jolyn 1996 jyly stajer-oqytýshy, keıin Qazaq memlekettik basqarý akademııasynda oqytýshy bolyp bastady. 1998 jyldan - Qazaqstan Respýblıkasy Ulttyq Bankiniń jetekshi sarapshy, bas sarapshy, bas sarapshy maman, bólim bastyǵy, Ǵylymı-zertteý jáne statıstıka departamenti dırektorynyń orynbasary, 2006 jyldan - Qazaqstan Respýblıkasy Ulttyq Bankiniń Úılestirý departamentiniń dırektory. 2014 jyldan - «Qazaqstannyń turǵyn úı qurylys jınaq banki» AQ basqarýshy dırektory, 2015 jyldyń shildesinen - Qazaqstan Respýblıkasy Prezıdenti Ákimshiliginiń Áleýmettik-ekonomıkalyq monıtorıng bólimi meńgerýshisiniń orynbasary, 11.2015 jyldan bastap - Áleýmettik-turmystyq sektor bóliminiń meńgerýshisi. Qazaqstan Respýblıkasy Prezıdenti Ákimshiliginiń Ekonomıkalyq monıtorıngi, 11.2018 jyldan bastap – Qazaqstan Respýblıkasy Prezıdentiniń kómekshisi, 03.2019 jyldan bastap – Qazaqstan Respýblıkasy Qarjy mınıstrliginiń Jaýapty hatshysy, 05.2020 jyldan – Qarjy mınıstri. 01.2022 jyldan bastap Qazaqstan Respýblıkasy, 29.03.2022 jyldan bastap - Qazaqstan Respýblıkasy Premer-Mınıstriniń orynbasary - Qazaqstan Respýblıkasy Qarjy mınıstri qyzmetine qaıta taǵaıyndalǵan.

Sonymen birge, Semeı qalasynda «Abay Media Group» medıaholdıngi ashyldy. Jańa aqparattyq uıymnyń basshysy bolyp Mıras Malǵajdarov taǵaıyndaldy.

Ol osyǵan deıin Óskemendegi «Shyǵys Aqparat» JShS basshysynyń birinshi orynbasary qyzmetin atqarǵan. «Abay Media Group» JShS quramyna abaiaqparat.kz, abaynews.kz, semeynews.kz ınternet portaldary, «Semeystan», «Tıpıchnyı Semsk», «Semey Life», «Semey Public», «Semey 24», «ABAI AQPARAT» syndy ınternet jobalary kiredi. Sondaı-aq, «Content analytics», IT jobalardy qurastyrý jáne basqarý, mobılografııa salasyn damytý bólimderi men «Áleýmettik taldaýlar júrgizý ortalyǵy» bar.

Óńirler boıynsha, Qyzylorda oblysynda birqatar basqarmalarǵa basshy taǵaıyndaldy.

Qaldarbekov Musa Ospanuly Qyzylorda oblysynyń kásipkerlik jáne ónerkásip basqarmasynyń basshysy laýazymyna taǵaıyndaldy. M. Qaldarbekov 1972 jyly Qyzylorda oblysynda dúnıege kelgen. Almaty tehnologııalyq ınstıtýtyn ınjener-mehanık, ekonomıst mamandyqtary boıynsha bitirgen. Eńbek jolyn Kentaý tigin fabrıkasynyń slesari retinde bastap, Almaty qalasyndaǵy «Kerege» kásipornynda basshylyq qyzmet atqarǵan. Ár jyldary Almaty qalasynyń Áýezov, Jetisý jáne Alataý aýdandarynyń salyq komıtetinde jaýapty qyzmetter atqardy. Salyq salasynyń maıtalmany retinde ár jyldary Qarjy mınıstrligi Memlekettik kirister komıtetiniń Batys Qazaqstan, Qyzylorda, Jambyl oblystary boıynsha departamenti basshysynyń orynbasary boldy. 2019-2021 jyldary Qarmaqshy aýdanynyń ákimi, 2021 jyldan beri Qyzylorda oblysynyń jumyldyrý daıyndyǵy basqarmasynyń basshysy qyzmetin atqaryp keldi.

Al Qyzylorda oblysynyń baqylaý jónindegi basqarmasyna Shámenov Baýyrjan Serikuly basshylyq qyzmetke keldi. Baýyrjan Shamenov 1981 jyly Qyzylorda oblysynda dúnıege kelgen. Qazaq gýmanıtarlyq zań ýnıversıteti men Quqyq jáne naryq akademııasyn bitirgen. Eńbek jolyn «Rýh» zań kompanııasynyń zańgeri retinde bastaǵan. Ár jyldary oblystyq qazynashylyq departamenti men Memlekettik qyzmet isteri agenttiginiń oblys boıynsha basqarmasynda jaýapty qyzmetter atqarǵan. 2008-2013 jyldary oblys ákimi apparatynyń memlekettik-quqyqtyq jumystar bóliminiń basshysy bolǵan. 6 jyldan astam oblystyq tabıǵı resýrstar jáne tabıǵat paıdalanýdy retteý basqarmasy basshysynyń orynbasary laýazymynda, 2019 jyldan bastap osy atalǵan basqarmanyń basshysy bolyp qyzmet atqardy.

Sondaı-aq Qyzylorda oblysynyń energetıka jáne turǵyn úı-kommýnaldyq sharýashylyq basqarmasynyń basshysy bolyp Aıdos Dáribaev taǵaıyndaldy.

A. Dáribaev 1987 jyly Qyzylorda qalasynda dúnıege kelgen. Almaty energetıka jáne baılanys ınstıtýtyn, Reseı halyq sharýashylyǵy jáne memlekettik qyzmet akademııasyn, Qorqyt ata atyndaǵy Qyzylorda memlekettik ýnıversıtetin bitirgen. Eńbek jolyn «KEGOC» (KEGOK) aktsıonerlik qoǵamynyń ınjeneri bolyp bastaǵan. Ár jyldary Qyzylorda elektr taratý toraptary kompanııasynyń Syrdarııa, Qazaly aýdandyq, Qyzylorda qalalyq elektr toraptarynyń dırektory qyzmetterin atqardy. 2014-2018 jyldary Eýrazııa ekonomıkalyq komıssııasy Energetıka departamentiniń konsýltanty, Almaty, Qyzylorda elektr taratý toraptary kompanııasynyń basqarma tóraǵasynyń orynbasary, birinshi orynbasary boldy. Energetıka mınıstrligi Elektr energetıkasyn damytý departamentiniń dırektory retinde jumys istedi.

Apta sońynda Tsıfrlyq damý, ınnovatsııalar jáne aeroǵarysh ónerkásibi mınıstrliginiń baspasóz hatshysy bolyp Erhan Tátken taǵaıyndaldy.

Erhan Tátken S.Toraıǵyrov atyndaǵy Pavlodar memlekettik ýnıversıtetin «jýrnalıstıka» mamandyǵy boıynsha támamdaǵan. Eńbek jolyn 2012 jyly «Qazaqstan» Respýblıkalyq teleradıokorporatsııasynyń Pavlodar oblystyq fılıalynda redaktor-júrgizýshi qyzmetinen bastaǵan. Odan keıin «Habar» agenttiginde, QR Aqparat jáne kommýnıkatsııalar, QR Qoǵamdyq damý mınıstrlikterinde jumys istedi. Al 2020 jyldan 2022 jyldyń aqpanyna deıin QR Memlekettik qyzmet isteri agenttiginde baspasóz hatshy bolyp qyzmet atqardy.






Uqsas jańalyqtar
Seriktester jańalyqtary

Jańalyqtar

Úrdis

MURAǴAT