Elordada búldirshindi ajaldan qutqarýǵa qatysqan ekinshi azamat baspanaly boldy
2022 jylǵy 12 mamyr 12:27

Elordada búldirshindi ajaldan qutqarýǵa qatysqan ekinshi azamat baspanaly boldy

NUR-SULTAN. QazAqparat – Keshe elordada 8-qabattaǵy terezeden salbyrap turǵan balany qutqarýǵa qatysqan Saǵı Jylqyshıevke 2 bólmeli páterdiń sertıfıkaty tabys etildi, dep habarlaıdy QazAqparat tilshisi.

«Páterdiń sertıfıkatyn aldym. Úı áli bitpegen. Sol úshin búgin sertıfıkat tapsyrdy. Páterdi Alla qalasa alamyz», - dep qýanyshymen bólisti Saǵı Jylqyshıev.

GBG qurylys kompanııasynyń komfort+ sanattaǵy turǵyn úıiniń qurylysy kelesi jyly aıaqtalady. Turǵyn úı qurylysyna memlekettiń kepildigi bar.

Aıta keteıik, keshe tańerteń elordada ýaqytsha turyp jatqan Qyzylorda turǵyny 8-qabatta terezeden salbyrap turǵan búldirshindi qutqaryp qaldy. Bul oqıǵanyń vıdeosy jelide keń taralyp, Sábıt Shontaqbaevtyń batyl áreketine kópshilik tánti boldy. QR Tótenshe jaǵdaılar birinshi vıtse-mınıstri Ibragım Kúlshimbaev azamatty «Tótenshe jaǵdaıdaǵy erligi úshin» tósbelgisimen marapattasa, Nur-Sultan ákimi Altaı Kólginov jeke qabyldap, onyń Lokomotıv zaýytyna jumysqa ornalastyrylatynyn aıtty.

Al «G-park» qurylys kompanııasy oǵan úsh bólmeli páter syıǵa tartty.

Keıinnen Sábıtke kishkentaı qyzdy qutqarýǵa Saǵı esimdi jigittiń kómek kórsetkeni belgili bolyp, áleýmettik jeli qoldanýshylary oǵan da páter berý kerektigin jazǵan edi. Kóptiń qalaýy oryndalyp, endi búgin Saǵı da baspana kiltin alyp otyr.


Jańalyqtar

Úrdis

MURAǴAT