Jaqyn kúnderi saıası qýǵyn-súrgin qurbandaryn aqtaý jumysynyń qorytyndysy shyǵarylmaq
2022 jylǵy 12 mamyr 12:07

Jaqyn kúnderi saıası qýǵyn-súrgin qurbandaryn aqtaý jumysynyń qorytyndysy shyǵarylmaq

NUR-SULTAN. QazAqparat – QR Premer-Mınıstriniń orynbasary Eraly Toǵjanov 31 mamyrǵa qaraı saıası qýǵyn-súrgin qúrbandaryn tolyq aqtaý jónindegi komıssııanyń jumysyna qorytyndy beriletinin málim etti, dep habarlaıdy QazAqparat tilshisi.

«Saıası qýǵyn-súrgin qurbandaryn tolyq aqtaý jónindegi respýblıkalyq komıssııasynyń birneshe otyrysy ótkizildi. Qazirdiń ózinde belgili bir qorytyndysy jasalyp, oqýlyqtar basyp shyǵaryldy. Jýyqta Memleket hatshysynyń tórǵalyq etýimen de otyrys ótkenin bilesizder. 31 mamyrǵa qaraı mindetti túrde jumystardyń qorytyndysy shyǵarylady», - dedi ol Úkimet otyrysynan keıin jýrnalısterdiń saýalyna bergen jaýabynda.

Sondaı-aq ol 9 mamyr merekesiniń ataýy men mazmunyn ózgertý týraly usynystarǵa qatysty óz usynysyn atady.

«9 maıdy Jeńis kúni emes, aza tutý kúni etip atap ótý týraly másele baıaǵydan kóterilip kele jatyr. Bul másele boıynsha árkimniń óz oıy bar. Shyn máninde bul - ári Jeńis kúni, ári eske alý kúni. Meniń oıymsha, olardy bir-birinen bólip qaraýdyń qajeti joq shyǵar. Ondaı másele kún tártibinde turǵan joq dese de bolatyn shyǵar. Jeńis kúnin jerimizdi qorǵap qalǵan atalarymyz ben ákelerimizdi eske alyp jatsaq, munyń esh sókettigi joq dep oılaımyn. Meniń jeke ustanymym osyndaı», - dedi Úkimet basshysynyń orynbasary.

Bir aı buryn Saıası qýǵyn-súrgin qurbandaryn tolyq aqtaý jónindegi memlekettik komıssııanyń otyrysy ótip, zertteýshi ǵalymdar júrgizgen ǵylymı izdenisterdiń nátıjeleri, memlekettik komıssııany zańdyq jáne termınologııalyq turǵydan qamtamasyz etý máseleleri qaralǵan bolatyn.


Seriktester jańalyqtary

Jańalyqtar

Úrdis

MURAǴAT