Zeınetaqy jınaqtaryndaǵy ınvestıtsııalyq tabys jyl saıyn ósýde
2022 jylǵy 27 sáýir 02:32

Zeınetaqy jınaqtaryndaǵy ınvestıtsııalyq tabys jyl saıyn ósýde

NUR-SULTAN. QazAqparat - Zeınetaqy jınaqtaryndaǵy ınvestıtsııalyq tabystyń úlesi jyl saıyn ósip keledi. Bul týraly QazAqparat BJZQ silteme jasap habarlaıdy.

Jalpy, barlyq zeınetaqy aktıvteri BJZQ-ǵa biriktirilgen sátten bastap Ulttyq bank qamtamasyz etken ınvestıtsııalyq tabys 6,3 trln teńgeni qurady.

«2022 jyldyń 1 qańtary men 1 sáýiri aralyǵynda ınvestıtsııalyq tabys shamamen 295,8 mlrd teńgege ósti. Zeınetaqy aktıvteriniń tabystylyǵy qarjy quraldaryn naryqtyq jáne valıýtalyq qaıta baǵalaý saldarynan ózgerip, jyl basynan beri túrli kezeńderde oń da, teris te qalyptasty», - delinge Qordyń habarlamasynda.

Zeınetaqy jınaqtary qarjy quraldaryna túrli valıýtada ınvestıtsııalanǵan. Investıtsııalardyń 2/3 teńgemen jáne 1/3 shetel valıýtasymen, valıýtalyq ınvestıtsııalardyń basym bóligi AQSh dollarymen ornalastyryldy. Tıisinshe, dollar baǵamy zeınetaqy aktıvteri quramyndaǵy ınvestıtsııalyq kiriske áser etedi: ulttyq valıýta nyǵaıǵan kezde ınvestıtsııalyq kiris tómendep, dollar baǵamy ósken kezde joǵarylaýy múmkin.

2022 jyldyń qańtary men naýryzdyń basy aralyǵynda AQSh dollaryna qatysty teńge baǵamy álsirep, dollar quny 431 teńgeden 495 teńgege deıin, odan ári 512 teńgege deıin ósken bolatyn. Osylaısha, apta saıyn zeınetaqy aktıvterin oń valıýtalyq qaıta baǵalaý qalyptasty. Salymshylar da ózderiniń jeke zeınetaqy shottarynda aıtarlyqtaı oń ınvestıtsııalyq tabysty baıqady. Sodan keıin ulttyq valıýta nyǵaıyp, dollar baǵamy sáıkesinshe, tómendedi. 1 sáýirde 1 dollardyń baǵamy 466 teńge boldy.

Nátıjesinde qarjy naryǵyndaǵy jaǵymsyz oqıǵalar jáne aktıvterdi valıýtalyq qaıta baǵalaý ınvestıtsııalyq kiristilikke keri áser etti. Sońǵy kúntizbelik 12 aıda kiristilik 10,43% bolsa, sáıkes kezeńde ınflıatsııa 12,0% jetti. Zeınetaqy aktıvterin qaıta baǵalaý apta saıyn jáne aıdyń sońǵy kúninde júrgiziletindikten, salymshylar bul ózgeristerdi ózderiniń úzindi kóshirmelerinen kóre alady.

Aıta ketý kerek, zeınetaqy jınaqtary – bul uzaq merzimdi ınvestıtsııalar jáne ınvestıtsııalyq tabystyń mólsherin keminde 1 (bir) jyl kezeńinde taldaǵan oryndy. Qysqa merzimdi derekter (apta saıynǵy, aı saıynǵy jáne t.b.) – aıqyn nátıje bermeıdi, óıtkeni, ol naryqtyń únemi qubylmalyǵyna táýeldi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT