Tórt óńirdegi muǵalimderdiń jalaqasy 790 myń teńgege deıin ósedi - Aımaǵambetov
2022 jylǵy 20 sáýir 14:13

Tórt óńirdegi muǵalimderdiń jalaqasy 790 myń teńgege deıin ósedi - Aımaǵambetov

NUR-SULTAN. QazAqparat - Atyraý, Mańǵystaý, Almaty jáne Túrkistan oblystaryna basqa óńirlerden baratyn muǵalimder eki ese joǵary jalaqy alady. Bul týraly Májilistiń jalpy otyrysynda Bilim jáne ǵylym mınıstri Ashat Aımaǵambetov málim etti, dep habarlaıdy QazAqparat tilshisi.

Búgin palata otyrysynda depýtat Jámılá Nurmanbetova muǵalimderdiń jetispeýshiligi men bilim berý sapasynda úlken alshaqtyq bar óńirlerdi qoldaý maqsatynda úzdik pedagogterdi tartýǵa qatysty áleýmettik qoldaý sharalarynyń tıisti toptamasymen ázirlengen arnaıy baǵdarlama bar ekenin eske saldy.

«Ony iske asyrý úshin naqtylanǵan respýblıkalyq bıýdjet jobasynda Atyraý, Mańǵystaý, Almaty jáne Túrkistan oblystaryna eki myńǵa jýyq pedagogti tartý úshin 3,9 mlrd teńge kózdelgen. Bul rette atalǵan qarajatta laýazymdyq jalaqyǵa 150 paıyz mólsherinde jalaqyǵa yntalandyrý ústemaqysyn belgileýge ǵana arnalǵan shyǵystar josparlanǵan. Biz áleýmettik qoldaýǵa baǵyttalǵan basqa shyǵystardy kórmeı otyrmyz. Osyǵan baılanysty baqa eldi mekenderden kóship kelgen muǵalimder úshin turǵyn úımen qamtamasyz etý máselesin qosa alǵanda, áleýmettik toptama qandaı bolady?», - dep surady depýtat.

Óz kezeginde Bilim jáne ǵylym mınıstri Ashat Aımaǵambetov bul baǵdarlama bıyl qyrkúıek aıynan bastalatynyn aıtty.

«Osy qarastyrylyp otyrǵan 3,9 mlrd teńge eki máseleni de qamtyp otyr. Birinshiden, muǵalimderdiń eki ese jalaqy alýy jáne buǵan qosa turǵyn úı jaldaý men kommýnaldyq shyǵyndardy tóleý eskerilgen. Nege biz bul máseleni jalaqynyń ishinde qarastyryp otyrmyz? Bizdiń zańnamaǵa sáıkes, turǵyn úı jaldaý men kommýnaldyq tólemaqyny tek jergilikti bıýdjetten bere alamyz. Sondyqtan jergilikti bıýdjetke aýyrpalyqty túsirmes úshin jáne zańnamany buzbaý úshin bul máseleni jalaqy arqyly sheship otyrmyz. Máselen, Munaıly aýdanyna kóship baratyn muǵalim qyrkúıek aıynda jalaqy alatyn bolsa, onda onyń jalaqysy 790 myń teńgege jýyq bolady. Sol 790 myńnyń 140 myńǵa jýyǵy kommýnaldyq shyǵyndar bolady, al 650 myń teńgege jýyǵy - muǵalimniń óz jalaqysy», - dedi mınıstr.

Bul turǵyla ol vedomstvonyń buıryǵynda jáne muǵalimniń alǵan túbirteginde osy másele jazylatynyn atap ótti.

Osy taqyrypqa baılanysty Májilis tóraǵasy Erlan Qoshanov atalǵan qadamdar qosymsha suraqtar týdyratynyn aıtty.

«Nelikten tórt óńir ǵana qamtylǵan? Ekinshiden, basqa óńirden Munaıly aýdanyna kelgen ustaz eki ese jalaqyny artyq alady. Sonda jergilikti ustaz eki ese tómen jalaqy alyp, biraq júktemesi sonymen birdeı bolady. Sol jaǵynan jergilikti muǵalimderden narazylyq týyndamaı ma? Budan bólek, eki myń bilikti mamandy mektepterge alyp kelemiz dep aıtyp otyrsyzdar. Osy oraıda túpki maqsat qandaı, ıaǵnı ustaz tapshylyǵyn joıý ma, álde solardy úlgi tutyp, jergilikti jerlerdegi mektepterdiń bilim sapasyn arttyrý ma? Sonymen qatar basqa oblystarda tapshylyq joq pa?», - dep surady Májilis tóraǵasy.

Bilim mınıstri atalǵan tórt óńirge ne sebepti tańdaý jasalǵanyn túsindirdi.

«Tórt óńirdi tańdaý eki krıterıge sáıkes júrgizildi. Birinshiden, tórt óńirde muǵalim tapshylyǵy joǵary deńgeıde. Ekinshiden, bul oblystarda bilim berý sapasy boıynsha halyqaralyq ári ózimizdiń zertteýler aıasynda eń sońǵy qatarda tur. Sondyqtan osy óńirlerdi tańdap aldyq. «Áleýmettik teńsizdik bola ma» degen táýekeline toqtalsaq, meniń oıymsha, mundaı táýekel bolmaıdy. Nege? Jalpy, bizde 350 myń muǵalimniń jalaqysyn tóleý júıesi birdeı. Biraq birdeı bolǵannan keıin, eki muǵalim bir mektepte jumys istep jatsa, ıaǵnı jalaqysy men júktemesi birdeı qoıylsa da, biliktiligine sáıkes qazirdiń ózinde aıyrmashylyǵy bolady. Mysaly, onyń «sheber» degen biliktiligi bolsa, 50 paıyzǵa jalaqy artyq alady. Al magıstratýra dárejesi bolsa, onda aı saıyn 30 myń teńge ústemaqy tólenedi. Sol sııaqty bul jerde de qosymsha sharttar qosylyp otyr. Eger sol mekteptegi muǵalimniń ózi basqa tapshylyǵy bar jerge kóship barsa, ekinshi shart – ol muǵalim bizdiń tıisti emtıhannan óte alsa, bul muǵalimde dál osyndaı jalaqy alýǵa múmkindigi bar», - dedi Ashat Aımaǵambetov.

Sonymen qatar mınıstr atalǵan baǵdarlama muǵalim tapshylyǵy men bilim sapasyn kóterýge yqpal etetin bolady.

Budan buryn habarlanǵandaı, QR Bilim jáne ǵylym mınıstrliginiń Mektepke deıingi jáne orta bilim komıtetiniń tóraǵasy Gúlmıra Kárimova elimizdiń qaı óńirlerindegi muǵalimder joǵary jalaqy alatynyn aıtty.


Seriktester jańalyqtary

Jańalyqtar

Úrdis

MURAǴAT