Jambylda memlekettik satyp alýlardaǵy jergilikti qamtý úlesi 61,2 paıyzdy qurady
2022 jylǵy 20 qańtar 01:59

Jambylda memlekettik satyp alýlardaǵy jergilikti qamtý úlesi 61,2 paıyzdy qurady

TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen ótken keńeste jergilikti qamtýdy damytý máseleleri talqylandy, - dep habarlaıdy QazAqparat tilshisi.

Óńirlik kásipkerler palatasynyń dırektory Erkin Atymtaev 2021 jyldyń qorytyndysyna sáıkes «Qarapaıym zattar ekonomıkasy» baǵdarlamasynyń 8 baǵyty boıynsha (onyń ishinde jeńil, tamaq, jıhaz, qaǵaz, hımııa ónerkásibi, mashına jasaý, qurylys, farmatsevtıka) memlekettik satyp alýlardaǵy jergilikti qamtý úlesi 61,2 paıyzdy quraǵanyn jetkizdi.

Ol jergilikti qamtýdy damytý boıynsha kórsetkishi tómen aýdandar retinde Merki, Moıynqum, Sarysý, T.Rysqulovty atady.

«Memlekettik satyp alýlardaǵy jergilikti qamtý kórsetkishteriniń tómendeýine áser etetin negizgi sebep – ónim jetkizýshilerdiń jergilikti qamtý boıynsha eseptilikti durys toltyrmaýy jáne bul esepterdi tapsyrys berýshilerdiń ózderi qabyldaýy», - dep atap ótti baıandamashy.

Qurylys basqarmasynyń basshysy Erlan Orynbaev qurylys-montaj jumystaryndaǵy qazaqstandyq qamtý úlesi 90 paıyzdy, onyń ishinde jergilikti qamtý úlesi 25 paıyzdy quraıtynyn habarlady. Óńirde qurylys materıaldaryn shyǵaratyn 152 kásiporyn tirkelgen.

Sondaı-aq, aımaq basshysy aýdan ákimderiniń esepterin tyńdap, memlekettik satyp alýlardaǵy qazaqstandyq qamtý úlesine turaqty túrde monıtorıng júrgizýdi tapsyrdy.

«Qarapaıym zattar ekonomıkasy» baǵdarlamasy ımportty almastyrýǵa jáne halyq tutynatyn taýarlar óndirisi men qyzmetterdi damytýǵa baǵyttalǵan naqty jobalardy iske asyrýǵa múmkindik berýde. Bul múmkindikti barynsha paıdalanýǵa tıispiz. Qajetti qurylys taýarlarynyń tizimin jasap, olardy ózimizdiń oblysta óndirý isin jolǵa qoıý kerek. ST-KZ sertıfıkatyn áli almaǵan kásiporyndarmen barynsha jumys júrgizý qajet»,-dedi Berdibek Saparbaev.


Uqsas jańalyqtar
Avtor:
Tilshi

Jańalyqtar

MURAǴAT