Qazaqstanda suıytylǵan gaz óndiretin 3 zaýyt salynady
2021 jylǵy 30 qarasha 10:21

Qazaqstanda suıytylǵan gaz óndiretin 3 zaýyt salynady

NUR-SULTAN. QazAqparat – Qazaqstanda suıytylǵan gaz óndiretin 3 zaýyt salynady. Bul týraly Úkimet otyrysynda QR Energetıka mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Suıytylǵan gaz óndirýdi arttyrý maqsatynda 3 jobany iske asyrý josparlanyp otyr. Birinshi joba – Aqtaý qalasynda tómen qýatty gaz óńdeý zaýyty. Onyń qýaty jylyna 60 myń tonnany, al ınvestıtsııalar kólemi 1,5 mlrd teńgeni quraıtyn bolady. Jobanyń aıaqtalýy osy jyldyń sońyna josparlanǵan. Ekinshi joba - Jańaózen qalasynda jumys istep turǵan Qazaq gaz óńdeý zaýytynyń ornyna jańa gaz óńdeý zaýytyn salý. Onyń qýaty 900 mln tekshe metrdi quraıdy dep josparlanýda. Jobanyń quny – 147 mlrd teńge. Qurylystyń aıaqtalý merzimi - 2023 jyl», - dedi óńdeý ónerkásibin damytý týraly baıandaǵan mınıstr.

Onyń atap ótýinshe, atalǵan zaýyt shamamen 760 mln tekshe metr taýarlyq gaz, 232 myń tonna suıytylǵan munaı gazyn jáne 82 myń tonna kóleminde pentan-geksan fraktsııasyn óndiretin bolady.

«Úshinshi jobaǵa keletin bolsaq, osy jyly Qashaǵan ken ornynda qýaty 1 mlrd tekshe metrdi quraıtyn gaz óńdeý zaýytynyń qurylysy bastaldy. Jobanyń quny 380,8 mlrd teńgege teń. Qurylystyń josparlanǵan aıaqtalý merzimi - 2023 jyl», - dedi ol.

Maǵzum Myrzaǵalıevtiń aıtýynsha, zaýyt 800 mln tekshe metr taýarlyq gazy, 119 myń tonna suıytylǵan gaz, 35 myń tonna kondensat jáne 212 myń tonna kúkirt óndiredi.

«Atalǵan jobalardy iske asyrýdyń arqasynda 2025 jylǵa qaraı suıytylǵan gaz óndirisiniń kólemi 300 myń tonnaǵa artyp, 3,5 mln tonnany quraıtyn bolady. Al tartylatyn ınvestıtsııalardyń kólemi 530 mlrd teńge bolady dep josparlanýda», - dedi mınıstr.


Uqsas jańalyqtar

Jańalyqtar

MURAǴAT