Almaty dárigerleri salmaǵy 530 gramm balany aman alyp qaldy

ALMATY. QazAqparat -Almatyda Perınatologııa jáne balalar kardıohırýrgııasy ortalyǵynyń dárigerleri jansaqtaý bóliminiń qabyrǵasynda shala týǵan sábıdiń ómiri úshin 55 kún kúresti. Qyz bala 26-shy aptada dúnıege kelgen, salmaǵy 530 gramm. Qazir náreste anasymen birge úıine shyqty, dep habarlaıdy QazAqparat tilshisi.

Perınatologııa jáne balalar kardıohırýrgııasy ortalyǵynyń baspasóz qyzmetiniń málimetinshe, sábı 26 kún ókpeni jasandy jeldetý apparatynda bolǵan. Sodan keıin ol jańa týǵan náresteler patologııasy bólimine aýystyryldy.
«Búgingi tańda 1 keli 925 gramm salmaqqa jetip, náresteniń jaǵdaıy turaqtaldy», – deıdi ortalyqtyń bas dárigeri Gúlnár Nurlanova.
Óz kezeginde qyzdyń anasy Ortalyqtyń medıtsına qyzmetkerlerine alǵysyn bildirdi.
«Júktilik patologııasy bólimshesiniń meńgerýshisi Aıgúl Ermuhanqyzy Seıtalıevaǵa jáne basqa da dárigerlerge, barlyq akýsherlerge,tazalyq jumystaryn júrgizgen medbıkelerge úlken alǵysymdy bildiremin. Barshańyzǵa kóp rahmet! Balalarymyzǵa kórsetken kómegińiz úshin rahmet. Denderińizge saýlyq, jaqyndaryńyzǵa amandyq tileımin. Ortalyqtaryńyz gúldene bersin», - dedi qyzdyń anasy.
Aıta keteıik, jyl basynan beri ortalyqta 613 shala týǵan náreste dúnıe esigin ashqan.