Koronavırýstyń ekinshi tolqynyna eldegi dári-dármek qory jetkilikti me

NUR-SULTAN. QazAqparat - Álemdi alańdatqan qaýipti indettiń ekinshi tolqyny keledi dep boljanýda. Osy oraıda búginde elimizde qaýipsizdik sharalaryn kúsheıtý, karantın talaptaryn qatańdatý isi qolǵa alyna bastady. Sondaı-aq indetke qarsy dári-dármek de qory jınalyp jatyr, dep habarlaıdy QazAqparat tilshisi.

Uqsas jańalyqtar

Qyzylorda oblysynda 134 dárige shekti baǵa engizildi

«Buryn dári-dármekti jetkizý áýehaby arqyly 2 aptaǵa deıin ýaqyt alatyn, búginde jetkizý qyzmeti jedeldetildi. Qazir kez kelgen qoımaǵa 1 kúnniń ishinde jetkizý múmkindigi bar. Elordadaǵy qoımada 4 mlrd teńgeniń dári-dármegi bar, onyń ishinde 400 mln teńgeniń preparaty ol koronavırýs dertine arnalǵan. Qazirgi ýaqytta medıtsınalyq uıymdar 110% qamtamasyz etilip otyr. Bizge medıtsınalyq uıymdardy 1 aılyq dári-dármek qorymen qamtamasyz etý tapsyryldy. Sol úshin de kún saıyn dári-dármek qory jańartylyp otyrady», - dedi «SQ-Farmatsııa» JShS-nyń basqarma tóraǵasy Erhat Esqalıev atalǵan uıymda ótken reıd barysynda.

Onyń aıtýynsha, búginde satyp alynǵan dári-dármektiń 60% eldegi 4 habqa taratyldy.

«Biz dári-dármekterdi barlyq óńirlerge birden taratyp jibere almaımyz. Sebebi óńirlerdegi qoımalardyń aýmaǵy 300 sharshy metrdi quraıdy, bul degenimiz bar joǵy 2 júk kólik dári-dármek. Al keıbir óńirlerde dári-dármekti saqtaıtyn qoıma joq, sondyqtan da júk kólikteri medıtsınalyq uıymdarǵa tikeleı jetkizip beredi. Búginde medıtsınalyq uıymdardyń suranysyn óteýden bólek, bizdiń qoımada 2 aıǵa jetetin dári-dármek qory bar. Óńirlerge júk kólikteri tynym tappaı kúndelikti jetkizip otyr», - dedi ol.

Atalǵan mekemeniń resmı deregine súıensek, qazirgi ýaqytta COVID-19 indetine arnalǵan 8,2 mlrd teńgeni quraıtyn 44 ataýly dári-dármek satyp alynýda.

Aıta ketsek, Antıkor qyzmetkerleri qoǵam belsendilerimen birge elordadaǵy SQ Farmatsııa JShS qoımasyndaǵy dári-dármek qoryna qatysty monıtorıng júrgizdi.