Erbolat Dosaev ınflıatsııaǵa qatysty túsinik berdi

NUR-SULTAN. QazAqparat – QR Ulttyq bankiniń tóraǵasy Erbolat Dosaev ınflıatsııaǵa qatysty túsinik berdi, dep habarlaıdy QazAqparat tilshisi.

«Álemdik qarjy jáne taýar naryqtary álemde koronavırýs taralýynyń ekinshi tolqyny jáne jańa shekteý sharalaryn engizý aıasynda qubylmaly bolyp qalýda.

Osy jaǵdaılarda aǵymdaǵy jyly Úkimet ІJÓ-niń 2,1 paıyzǵa qysqarýyn eskerip otyr, bul Ulttyq banktiń jańartylǵan boljamyna sáıkes keledi. Ulttyq bank 2020 jylǵa arnalǵan bıýdjettiń ólshemderin naqtylaý úshin aqsha-kredıt saıasaty kórsetkishteriniń jáne tólem balansynyń boljamyn jańartyp, usyndy. Bizdiń baǵalaýymyz boıynsha ınflıatsııa 2020 jyldyń sońyna deıin 8 paıyzǵa deıin jyldamdaıdy. Jyldyq ınflıatsııa aǵymdaǵy jylǵy qyrkúıekte 7 paıyz boldy», - dedi Dosaev Májilistiń jalpy otyrysynda.

Onyń sózine qaraǵanda, azyq-túlik ınflıatsııasy baǵanyń ósýine negizgi úles qosýdy jalǵastyrýda, ol aǵymdaǵy jylǵy qyrkúıekte 10,8 paıyzdy qurady. Onyń ósýi jetkizý tizbeginiń buzylýyna, shıkizat óniminiń qymbattaýy aıasynda óndirýshiler baǵasynyń ósýine baılanysty.

«Bıylǵy jyldyń sońyna deıin kommýnaldyq qyzmetter men kólik tarıfteriniń ósýi aıasynda 2020 jylǵy qyrkúıekte 3,6 paıyzǵa deıin jyldamdaǵan aqyly qyzmetter baǵasynyń qalypty ósýi boljanýda», - dedi UB basshysy.