Qazaqstanda qus tumaýynan qansha qus qyryldy

NUR-SULTAN. QazAqparat – Patogendi qus tumaýynan 873,9 myń qus qyryldy. Bul týraly QR Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.

Uqsas jańalyqtar

Qus tumaýynan zardap shekkenderge ótemaqy tolyq tólendi – AShM

«2005 jyldan beri salamatty bolyp kele jatqan respýblıkada qus tumaýy tirkeldi. 2020 jylǵy 22 qyrkúıekten 19 qazanǵa deıingi kezeńde qustardyń ólim-jitimi tirkeldi. Onyń ishinde 7 oblysta joǵary patogendi qus tumaýyna kúdik nemese rastalǵan jaǵdaılar oryn aldy. Jeke aýlalarda 26,5 myń qus, 3 qus fermasynda 847,4 bas qyryldy. Osylaısha, joǵary patogendi qus tumaýynan barlyǵy 873,9 myń qus qyrylyp, bul jalpy qustardyń 1,9 paıyzyn qurady», - dedi mınıstr Úkimet otyrysynda.

Qustardyń ólim-jitimi bastalǵan sátten bastap mınıstrlik janynan jáne óńirlerde Jedel shtab quryldy, shtabtardyń otyrystary kúndelikti ótkizilýde. Infektsııanyń ár oshaǵy karantınge qoıylyp, qustardy jáne qus sharýashylyǵy ónimin ákelýge nemese áketýge tyıym salyndy. Infektsııa oshaǵyn joıa otyryp jáne dezınfektsııa júrgize otyryp, oqshaýlaý jáne joıý sharalary júrgizilip jatyr.

«Býferlik aımaq qurý úshin jabaıy qustardyń ushyp kelý jolynda úı qustaryn májbúrlep vaktsınalaý úshin veterınarııalyq preparattardyń respýblıkalyq qorynan 4,4 mln doza kóleminde qus tumaýyna qarsy vaktsına bólindi. Búginde jeti oblystaǵy jeke aýlalarda qustardyń ólim-jitimi toqtatyldy, 3 qus fermasynda qustardyń qyrylýy azaıdy. Aýrý qustardy joıý jáne olardyń ıelerine qunyn óteý boıynsha jumystar júrgizilip jatyr», - dedi S. Omarov.

Onyń sózine qaraǵanda, epızootııalyq ahýal Aýyl sharýashylyǵy mınıstrligi men oblystar ákimdikteriniń turaqty baqylaýynda.