Qyrǵyzstan aýrýhanalaryna mıtıng kezinde zardap shekken 911 adam júgingen
2020 jylǵy 7 qazan 14:01

Qyrǵyzstan aýrýhanalaryna mıtıng kezinde zardap shekken 911 adam júgingen

NUR-SULTAN. KABAR-QazAqparat – Qyrǵyzstan eliniń medıtsınalyq mekemelerine mıtıngter kezinde zardap shekken 911 adam júgingen. Bul týraly QazAqparat Qyrǵyzstannyń Kabar agenttigine silteme jasap habarlaıdy.

Vedomstvo málimetterdiń 7 qazan kúngi saǵat 12:30-ǵa keltirilgenin atap ótti.

Kómekke júgingen 911 adamnyń ishinde zardap shekken 705 adam alǵashqy medıtsınalyq kómek kórsetilgen soń ambýlatorlyq em qabyldaýǵa jiberildi. Túrli jaraqattar alyp zardap shekken 205 adam aýrýhanaǵa jatqyzyldy, sonyń ishinde beseýi jansaqtaý bóliminde jatyr. Ulttyq gospıtalda 2001 jylǵy er adam qaıtys boldy.

Osylaısha, Bishkektegi travmatologııa jáne ortopedııa ǵylymı-zertteý ortalyǵyna barlyǵy zardap shekken 452 adam kelip túsken, sonyń ishinde 82 adam aýrýhanaǵa jatqyzyldy, bir adam jansaqtaý bóliminde jatyr.

Ulttyq gospıtalǵa 269 adam kelip túsken, sonyń ishinde 85 adam aýrýhanaǵa jatqyzyldy. 4 patsıent jansaqtaý bóliminde jatyr, bir adam qaıtys boldy.

1 qalalyq klınıkalyq emhanaǵa 58 adam kelip tústi, 48 adam ambýlatorlyq em alýǵa jiberildi. 10 adam aýrýhanaǵa jatqyzyldy.

Shý oblystyq aýrýhanasyna zardap shekken 112 adam kelip tústi. 100 adam ambýlatorlyq em qabyldaýǵa jiberildi. 12 adam aýrýhanaǵa jatqyzyldy.

Ulttyq hırýrgııa ortalyǵyna zardap shekken 20 adam jetkizilgen, sonyń ishinde tórteýi ambýlatorlyq em alýǵa jiberildi, 16 adam aýrýhanaǵa jatqyzyldy.

Barlyq patsıentterge qajetti medıtsınalyq kómek kórsetilip jatyr. Tıisti mamandardyń keńesi berilýde, zardap shekkender barlyq qajetti dári-dármektermen qamtamasyz etildi.

Aıta keteıik, jeksenbi, 4 qazan kúni Qyrǵyzstanda Jogorký Keneshke depýtattarynyń saılaýy ótti. Depýtattyq mandatqa 16 partııa úmitkerlik etti. Daýys berýdiń aldyn ala málimeti boıynshy, 7% mejeni 4 partııa eńserdi. Al, 5 qazan kúni saılaý nátıjesine kóńili tolmaǵan bir top adam ortalyq alańda mıtıng uıymdastyryp, onyń sońy jappaı tártipsizdikterge ulasty.


Jańalyqtar

MURAǴAT