+7 (701) 759 90 19
USD 412.55 EUR 468.66
RUB 5.79 CNY 58.80
Jańalyqtar

Otan qorǵaýshy elin qorǵaıdy, memleket erin qalaı qoldaıdy

2020 jylǵy 7 mamyr 10:11
Bólisińiz:
Otan qorǵaýshy elin qorǵaıdy, memleket erin qalaı qoldaıdy

NUR-SULTAN. QazAqparat - Búgin - Otan qorǵaýshy kúni. Óıtkeni, osydan týra 28 jyl buryn elimizdiń Memlekettik qorǵanys komıteti QR Qorǵanys mınıstrligi bolyp qaıta uıymdastyryldy. Dál osy kúni QR Tuńǵysh Prezıdenti - Elbasy Nursultan Nazarbaevtyń Jarlyǵymen QR Qarýly kúshteri quryldy. Joǵarǵy Bas Qolbasshy retinde Qarýly kúshterdi basqarýdy Prezıdent óz moınyna aldy. Al basqa qorǵanys isimen tikeleı shuǵyldanatyn alǵashqy Qorǵanys mınıstri bolyp, general-polkovnık Saǵadat Nurmaǵanbetov taǵaıyndalǵan edi.

Al 2012 jyldyń 3 mamyrynda elimizdiń Tuńǵysh Prezıdenti Nursultan Nazarbaev «Qazaqstan Respýblıkasy Qarýly Kúshteriniń 20 jyldyǵy týraly» Buıryqqa qol qoıdy. Osy buıryqqa sáıkes, qazaqstandyqtardyń erlikke toly shejiresin jáne Otanǵa qyzmet etý dástúriniń sabaqtastyǵyn sıpattaıtyn 7 mamyr - Otan qorǵaýshy kúni retinde elimizdiń memlekettik merekeler tizimine endi.

Qazaqstan memlekettigin damytýdyń Táýelsizdik jyldary ishinde árdaıym qorǵanys qabiletin nyǵaıtýǵa, zamanaýı jáne kásibı armııa kurýǵa erekshe kóńil bólip kele jatyr. Búginde Qazaqstan Respýblıkasynyń Qarýly Kúshteri jaýyngerlik daıarlyqtyń joǵary qarqyndy deńgeıimen, sapaly jumyldyrý rezervimen, ulttyq áskerı oqý oryndary júıesimen jáne qajetti materıaldyq-tehnıkalyq qamtamasyz etilýimen erekshelenedi. Qarýly Kúshter qatarynda qyzmet etý árbir qazaqstandyqtyń qurmetti mindeti, aǵa býynnyń batyrlyq jáne jaýyngerlik dástúrlerine negizdelgen patrıotızmniń joǵary adamgershilik mektebi retinde qalyptasyp ta úlgerdi. Áskerı qyzmetshiler joǵary kásibı daıarlyq, úılesimdilik pen jaýyngerlik daǵdy úlgisin kersetýde. Dál osy ataýly data qarsańynda Memleket basshysynyń elimizdiń tynyshtyǵyn, Otanymyzdyń jerin, shekarasyn qorǵaý jolynda eren eńbegimen, eline de degen qapysyz qyzmetimen erekshelengen áskerı qyzmetshilerge áskerı shender berýmen qatar erekshe kózge túsken áskerı qyzmetkerlerdi ordendermen, medaldarmen marapattaý dástúri qalyptasyp úlgerdi.

Búginde «Otan úshin janym pıda» dep jerimizdiń tutastyǵyn, Táýelsizdigimizdi qorǵaý jolynda jan aıamaı qyzmet etip júrgen áskerı qyzmetshiler ózderiniń azamattyq, áskerı paryzdaryn abyroımen atqaryp júr dep tolyqtaı aıta alamyz. Iá, erler elin qorǵaýda, eli erlerin qalaı qoldaýda? Osyǵan oraı búginde memleket tarapynan áskerılerge qandaı qoldaý kórsetiletindigin sholyp kórýge tyrystyq.

«Óz úıim - óleń tósegim» qashan bolar eken dep júrgen áskerı qyzmetshilerdiń de legi qalyń ekendigi aıtpasa da túsinikti. Osydan eki jyl buryn birneshe ondaǵan myń áskerı qyzmetshiniń jekemenshik baspanasy joq ekendigi aıtylǵan bolatyn. Olardyń basym bóligi jabyq qalashyq aýmaǵyndaǵy úılerde, áskerı qyzmetshilerge arnalǵan jataqhanalarda ne bolmasa páter jaldap turýǵa májbúr. Al olardy qalaı turǵyn úımen qamtýǵa bolady? Aıta keterligi, páter jaldap júrgen áskerı qyzmetshiniń otbasy múshelerine qaraı baspana jaldaýǵa 2012 jyldan beri memleket tarapynan ótemaqy tólenip kelgen edi. Biraq, sońǵy ýaqytta baspana jaldaý ótemaqysy turǵyn úı tólemi dep ózgertilip otyr. Al endi osy tólemdi áskerı qyzmetshiler ıpotekalyq kredıtti paıdalana otyryp, turyp jatqan úıin menshikke alýǵa, buryn alynǵan ıpotekalyq kredıtti óteýge, turyp jatqan páteriniń jalǵa alý aqysyn tóleýge, jeke turǵyn úı qurylysyn júrgizýge, turǵyn úı jaǵdaıyn jaqsartýǵa, sondaı-aq turǵyn úı qurylysy jınaq aqshasy túrindegi jınaqtardy tolyqtyra alady. Osy oraıda Qazaqstannyń Turǵyn úı qurylys jınaq banki tarapynan 2018 jyly usynylǵan «Áskerı baspana» baǵdarlamasy áskerı qyzmetshiler tarapynan zor suranysqa ıe bolǵandyǵyn atap ótken oryndy. Sol jyldyń ózinde áskerı qyzmetshiler 70 myń arnaıy esepshot ashyp, turǵyn úı tólemderin sol jerge jınaı bastady. «Áskerı baspana» baǵdarlamasynyń sharttary boıynsha páter qunynyń 5 paıyzyn ǵana jınaǵan áskerı qyzmetshiler jyldyq 7 paıyzdyq stavka boıynsha nesıe ala alady. Shart boıynsha páterdi tek bastapqy naryqta satyp alýǵa bolady: páter qunynyń 20 paıyzyn jınaǵandar qurylys salýshydan jyldyq 6%-ben jańa turǵyn úı satyp alýǵa nesıe rásimdeı alady. Ekinshi naryqta turǵyn úı satyp alǵysy keletin áskerı qyzmetshiler jyljymaıtyn múlik qunynyń 20 paıyzyn engizýi tıis, al nesıe boıynsha jyldyq mólsherleme 8 paıyzdy quraıdy. Búginde bul baǵdarlama arqyly birneshe myń áskerı qyzmetshi baspanaly boldy.

Munan bólek, áskerı qyzmetshilerdiń, sonyń ishinde qyzmetten ótý kezinde qaza tapqan, qaıtys bolǵan nemese habar-osharsyz ketken áskerı qyzmetshilerdiń balalaryna atqarýshy organdar turǵylyqty jeri boıynsha mektep jasyna deıingi balalar mekemelerinde kezekten tys oryn beredi. Onyń aqysy memlekettik mektep jasyna deıingi mekemeler úshin belgilengen mólsherde alynady. Áskerı qyzmetshilerdiń medıtsına mekemelerinde em-dom alýy da memleket qarajaty esebinen júzege asyrylady. Paryzyn óteý barysynda jaralanǵan, kontýzııa, jaraqat alǵan, mertikken nemese aýyrǵan áskerı qyzmetshiler Qarýly Kúshterdiń qarajaty esebinen sanatorııge jiberiledi.

Áskerı qyzmetshilerge jarylý qaýpi bar zattardy jáne ózge de jarylǵysh qurylǵylardy izdeý, tasymaldaý, zalalsyzdandyrý jáne joıý jónindegi jaýyngerlik mindetterdi oryndaǵan kezde ýákiletti organ aıqyndaıtyn tártippen táýligine bir aılyq eseptik kórsetkish mólsherinde járdemaqy tólenedi.

Radıoaktıvti materıaldardy, ıondaýshy sáýlelený kózderin, asa joǵary jıilikti jáne (nemese) zymyran otynynyń quramdastaryn paıdalanýmen, saqtaýmen baılanysty laýazymdarda qyzmet ótkeretin, sondaı-aq kórsetilgen jumystarǵa jáne obektilerde radıoaktıvti materıaldardy, ıondaýshy sáýlelený kózderin, asa joǵary jıilikti jáne (nemese) zymyran otynynyń quramdastaryn paıdalanýmen, saqtaýmen baılanysty apat saldarlaryn joıý jónindegi jumystarǵa ýaqytsha tartylatyn áskerı qyzmetshilerge naqty jumys istegen ýaqytyna tepe-teń uzaqtyǵy jylyna 12 táýlikke deıin qosymsha demalys beriledi.

Kelisimshart boıynsha áskerı qyzmetshiler qashyqtyǵy 100 shaqyrymnan astam bir eldi mekennen basqasyna qonys aýdarýǵa baılanysty qyzmet babymen aýysqan kezde (onyń ishinde áskerı bólim nemese bólimshe quramynda) olarǵa áskerı qyzmetshiniń ózine eki aılyq aqshalaı qarajat jáne onymen birge qonys aýdarǵan árbir otbasy múshesine aılyq aqshalaı qarajattyń jartysy mólsherinde kóterme járdemaqysy tólenedi.


Bizdiń kanalymyzǵa jazylyńyz:

Bólisińiz:

Avtor:

Marlan Jıembaı

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Janıbek Amangeldı
Janıbek Amangeldı
954-059
REDAKTOR
Aıdar Ospanalıev
Aıdar Ospanalıev
954-059

MURAǴAT