+7 (701) 759 90 19
USD 437.20 EUR 475.32
RUB 5.79 CNY 61.94
Jańalyqtar

Óskemende qarýly tonaýshyǵa qarsy turǵan áıel oqıǵanyń qalaı bolǵanyn aıtyp berdi

2020 jylǵy 22 qańtar 16:07
Bólisińiz:
Óskemende qarýly tonaýshyǵa qarsy turǵan áıel oqıǵanyń qalaı bolǵanyn aıtyp berdi

ÓSKEMEN. QazAqparat – Óskemendegi dúkenderdiń birin tonamaq bolǵan urynyń myltyǵyn tartyp alyp, betin qaıtarǵan dúken ıesi Elmıra Mýzafarova oqıǵanyń qalaı bolǵanyn aıtyp berdi, dep habarlaıdy QazAqparat.

Uqsas jańalyqtar
Elordada polıtseı otqa oranǵan páterden áıel adamdy alyp shyqty Frantsııada bilgisiz bireý adamdarǵa pyshaqpen shabýyldap, 2 adamdy mert qyldy Koronavırýs: Frantsııada túrmede otyrǵan 6 myńnan astam adam bostandyqqa shyqty

Ońaı oljaǵa kenelmek bolǵan qaraqshy Óskemen qalasyndaǵy Tynyshbaev kóshesinde ornalasqan «Asar» dúkeniniń satýshysyn qorqytyp, aqsha talap etken. Boıyn úreı bılegen satýshy qyz dúken ıesine qońyraý shalady.

«Ózim de sol mańaıda turamyn. Daýsy dirildegen satýshy tezirek kelýimdi surady. Qustaı ushyp jetip barsam, dúken ishindegi ury jaıbaraqat telefonmen sóılesip tur. Qarýy qolynda emes, ústelde jatyr eken. Shapshań qımyldap, myltyqqa shap berdim. Qaraqshy mundaıdy kútpegen bolýy kerek, kádimgideı abdyrap qaldy», - deıdi Elmıra Mýzafarova.

Tonaýshynyń birinshi aıtqan sózi «Ákel myltyqty!» bolǵan. Sol kezde dúken ıesi «Bul jerden tabanyńdy jaltyrat!» dep jaýap qaıtarǵan. Kenet qaraqshy dúken ıesiniń qolyndaǵy qarýǵa jarmasa ketedi.

«Onyń ishimdik urttap alǵanyn baıqadym. Berispeı alysa kettim. Myltyqpen basynan uryp jibergen kezde ol keri shegindi. Qaraqshy qarýdy qaıtaryp bersem, dúkenge qaıtyp kelmeıtinin aıtty. Onyń bul «qarmaǵyna» ilikkem joq» - deıdi Elmıra Mýzafarova.

Amaly quryǵan tonaýshy oqıǵa ornynan iz sýytqanymen, jazadan jaltara almady. Tártip saqshylary kóp uzamaı ony qolǵa túsirgen. 1965 jylǵy Óskemen qalasynyń turǵynyna qatysty QR Qylmystyq Kodeksiniń 192 jáne 287-baptary boıynsha sotqa deıingi tergeý júrgizilýde. Sońynan anyqtalǵandaı, qaraqshynyń qolynda oq atýǵa jaramdy bir uńǵyly sholaq myltyq bolypty.

«Saýda-sattyqpen 2000 jyldardan beri aınalysyp kelemin. Myna oqıǵa túk emes. Sol tusta nebir sumdyq jaǵdaılardy bastan ótkerdik qoı. Aýmaly-tókpeli kezderde dúken tonamaq bolǵandar az emes-ti. Ondaıǵa etimiz ábden úırenip alǵan» - deıdi Elmıra Mýzafarova.

Altaı aýdanynda dúnıege kelgen azamatsha búginde eki qyzyn qııaǵa qondyryp, nemere súıip otyrǵan áje. Onyń tyǵyryqqa tirelgen kezdegi áreketi eleýsiz qalmaı, Óskemen qalalyq Polıtsııa basqarmasynyń basshysy Daýr Ibraev Alǵys hatpen marapattady.

«Jaqynda ákem ómirden ozdy. Marqum ákem ylǵı da «Meniń qyzym 5 jigitke para-par» dep aıtyp otyratyn. Polıtsııa basshysynyń qolynan marapat alǵan kezde osy sózi esime tústi», - deıdi ol.

Eske sala ketsek, buǵan deıin Óskemende qarýly tonaýshyǵa qarsy turǵan qala turǵyny marapattalǵany týraly jazǵan bolatynbyz.


Bizdiń kanalymyzǵa jazylyńyz:

Bólisińiz:

Avtor:

Talǵatjan Muhametbekuly

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Janıbek Amangeldı
Janıbek Amangeldı
954-059
REDAKTOR
Aıdar Ospanalıev
Aıdar Ospanalıev
954-059

MURAǴAT