+7 (701) 759 90 19
USD 384.97 EUR 427.12
RUB 6.04 CNY 54.75
Jańalyqtar

Aǵashtan kartına jasaýǵa qyzyǵatyn jastardy tappadym – sheber

2019 jylǵy 20 qazan 13:42
Bólisińiz:
Aǵashtan kartına jasaýǵa qyzyǵatyn jastardy tappadym – sheber

AQTÓBE. QazAqparat – Sheber Qydyrbaı Naýshabaev bir jylda eki ǵana týyndy jasap shyǵarady. Temir ustasy bolyp jumys isteıtin ol qolónerge qyzyǵatyn shákirt taba almaı júr, dep habarlaıdy QazAqparat tilshisi.

Aqtóbe qalasynda turatyn sheber Qydyrbaı Naýshabaevty tanıtyn adam az. Sebebi ol kásibı sheberler sekildi buıymdaryn mol jasap satpaıdy, bir ǵana aǵashtan jonǵan týyndylaryn kásip etpeıdi. Ol ákesiniń aǵash jonyp, turmysqa qajetti dúnıeler jasap júrgenin kóredi, qyzyǵady, ózi de mashyqtanady. Besik, sandyqtyń jasalý jolyn bilip ósken ol Máskeý óner ýnıversıtetine túsip, úsh jyl bilim aldy. 90 jyldary Qazaqstan táýelsizdigin alǵan kezde turmys qamymen júrgen Qydyrbaı Naýshabaev otbasyna kóńil bólip, bala-shaǵa asyryraý jolymen vahtalyq ádispen jumysqa ornalasty. Aǵashtan qazaqtyń birtýar azamattarynyń beınesin jasap shyǵarǵan ol birer týyndysyn qabyrǵaǵa ilip qoıaǵan. Shań basqan ónerin arada 20 jyl ótken soń qaıta qolǵa alǵan.

«Men 20 jyl boıy qara jumys istep, ónerge den qoıa almadym. Táýelsizdiktiń alǵashqy jyldary el turmys qamyn oılap, kún kórýge kóshti. Al qoldan jasalǵan buıymdarǵa suranys bolmaǵan edi. Qazir vahtalyq ádispen jumys isteýdi qoıyp, bir jyldan beri aǵash jonýǵa kóshtim. Abylaı han, Nurpeıis Baıǵanın, Amangeldi Imanov, Abaı Qunanbaev, Qurmanǵazy sekildi birtýar azamattardyń beınesin somdaǵandy unatamyn. Ózim sheberlermen baılanys ornata almadym. Aqtóbede dál osyndaı joldy tańdaǵan sheberlerdi kórmedim», - dedi Qydyrbaı Naýshabaev.


Sheber aǵashty bazardan satyp alyp, qarańǵyda keptiredi. Mindetti túrde 3-4 jyl qarańǵyda, qurǵaq jerde saqtalýy tıis. Keptirý tehnologııasy durys saqtalǵan aǵash sý tıgende pishinin ózgerpeıdi. Qydyrbaı Naýshabaev bazarǵa bir barǵanda 10 dana aǵashty kestirip alady. Keıin keptirip, saqtap qoıady. Bir sátte eki týyndyny qatar bastaıdy.

«Bul adamnyń janyn, oıyn tynshtandyratyn jumys. Sondyqtan birkelki jumystan jalyqqan kezde aǵashty qolǵa alamyn. Qazir ózim kólik jóndeý ortalyǵynda temir ustasy bolyp jumys isteımin. Aǵashtar men qajetti qural-jabdyqtardyń bárin jumys ornyna ákelip qoıdym. Sebebi úıde jasaýǵa múmkindik joq, shashyp otyra da almaımyn», - dedi ol.

Shákirt tárbıeleýdi, bilgenin úıretýdi oıǵa alǵanymen bul salaǵa qyzyqqan jastar kezikpedi. Bilek túrip kelgenderi ýaqyt pen shydamdylyqty qajet etetin jumysqa úırenise almady.


«Aldyma kelgen jastarda qyr-syryn aıtyp, mıras etip qaldyrǵym keledi. Biraq kelmedi, úırenbedi. Keıbiri kelip, shydamaı ketip qalady. Bul oıdy, shyǵarmashylyq izdenisti qajet etedi. Máselen men Qurmanǵazynyń sýretin jonýdy bastadym. Ony bir jyl boıy jasap shyǵaramyn. ıAǵnı, árbir detalin jasaǵanda oılanamyn, keıde adamdardan uqsastyq izdeımin. Qulaǵyn shyǵarǵan kezde adamdardyń qulaǵym ustap kóremin. Shynaıy bolýy úshin avtobýs ishinde kele jatqanda da jurttyń júzine qarap júremin. Aqyndar qoıyn dápteri men qaryndashyn alyp júrse, men oıǵa túıip alamyn», - dedi ol.

Keıbir adamdar óz portretin jasap berýge usynys aıtady. Biraq sheber qazaq halqyna eńbegi sińgen adamdardyń beınesin jasap shyǵýdy maqsat etken.

«Sapaly sýret tabý qıyn. Sondyqtan mektep oqýshylarynyń oqýlyqtaryn qarap júremin. Taǵy bir ádetim – eski dúnıelerdi laqtyrmaımyn, jınap júremin. Qolymnan kelse jóndep, kádege jaratamyn. Máselen, eski saǵat, teledıdar, radıo jumys istep tur», - dedi Qydyrbaı Naýshabaev.


Aqtóbe oblysyndaǵy barlyq mýzeıdiń baılanys telefonyn alyp, qolóner sheberleriniń kórmesi bolsa shaqyrýdy suraǵan. Ázirge tek uıymdastyrýshylardyń ózimen baılanysqanyn kútýmen keledi. Bir ret ortalyqqa shyǵyp, kórmege qatysqan kezde usynystar bolatynyn aıtqan adamdar baılanys nómirin de jazyp alǵan. Biraq sheber óz týyndylaryn satpaıdy, keıde kóńili qalaǵan adamdarǵa tegin beredi.

Bizdiń kanalymyzǵa jazylyńyz:

Basty sózder: Aqtóbe oblysy, Óner,
Bólisińiz:

Avtor:

Altynaı Saǵyndyqova

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Bakytjan Erbasov
Bakytjan Erbasov
954-059

MURAǴAT