Qazaqstandyq úsh fılm Tájikstanda kórsetiledi

ALMATY. QazAqparat – Qazaqstandyq úsh fılm Tájikstanda kórsetiledi, dep habarlaıdy QazAqparat «Qazaqfılmge» silteme jasap.

Dýshanbe qalasynda 16-20 qazan aralyǵynda tájik kınosynyń kúnine oraı derekti fılmderge arnalǵan «Dıdor» halyqaralyq kınofestıvali ótedi. Bul baıqaýdyń halyqaralyq konkýrstyq baǵdarlamasynda rejısser Vladımır Tıýlkın túsirgen «13 shaqyrym» derekti fılmi kórsetiledi.

Atalǵan derekti fılm Serik Bodanbaev esimdi zaǵıp týraly baıandaıdy. Qystaýdan óz aýylyna qaraı bet alǵan basty keıipker óz ómiriniń eleýli sátterin eske alyp, óz boıyndaǵy qundylyqtarynyń syryn ashady. Kınotýyndyny QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen.

«Dıdor» kınofestıvaliniń konkýrstan tys – álemdik avtorlyq derekti fılmderge arnalǵan baǵdarlamasy sheńberinde «Qazaqfılm» kınostýdııasy shyǵarǵan «Ata kásip» (rej.Berik Jahanov) jáne «Chývash halqy. Qazaqstan – meniń ekinshi otanym» (rej. Dınara Manabaeva) atty derekti fılmder kórsetiledi.

Atalmysh kınofestıval Tájikstan úkimeti jáne «Tájikfılm» Memlekettik uıymynyń qoldaýymen uıymdastyrylǵan. Jalpy kınofestıval (kórkem jáne anımatsııalyq baıqaýy) Dýshanbe qalasynda 2004 jyldan bastap ótkiziledi. Bıyl uıymdastyrylǵan derekti fılmder festıvali alǵash ret ótkizilmek.

Uıymdastyrýshylardyń aıtýyna qaraǵanda bıyl festıvalge qatysýǵa 200-ge jýyq fılm úmit bildirgen. Nátıjesinde baıqaýdyń irikteý komıssııasy 15 elden 57 derekti fılmdi tańdap alǵan.