Shymkentte gaz jınaqtaý stansasyndaǵy jarylystyń sebebi belgili boldy

ShYMKENT. QazAqparat - Shymkenttegi gaz jınaqtaý stansasyndaǵy jarylysqa tehnologııalyq protsestiń buzylýy sebep bolǵan. Bul týraly oqys jaǵdaıǵa baılanysty tekserý sharalaryn júrgizgen komıssııa múshesi Sársenbaı Teńlesbaı aıtty, dep habarlaıdy QazAqparat tilshisi.

Komıssııa múshesiniń sózinshe, bir aıǵa jýyq júrgizilgen tekserý kezinde stansada sıymdylyǵy 60 tekshe metrlik avtotsısternadan gaz quıý kezinde shlang tolyq buralmaı, ajyrap ketken. Osy eki arada jaryq sónip, qaıta janǵan. Jas operator jigit shlangyny qaıta jalǵamaq bolǵanda ekpini qatty gaz ony ushyryp jiberip, shlang temirge soǵylǵan. Sol ýaqytta paıda bolǵan ushqynnan jarylys oryn alǵan. Oqıǵa kezinde kýágerler bolmaǵanymen, avtotsısternanyń júrgizýshisi komıssııa múshelerine kórgen-bilgenin aıtyp bergen. Ol der kezinde qashyp úlgergenimen, 20 jastaǵy operator qatty kúıip qalǵan. Komıssııa músheleri bul rette kináni operatorǵa artyp otyrǵan joqpyz degendi aıtady. Sebebi, tehnıkalyq sebepter men stansada bolǵan ahaýlar apatqa ákep soqtyrǵan.

«Komıssııa qazir jumysyn aıaqtady. Keshe apatty tergep tekserý aktisin toltyrdyq. Taǵy da qosymsha M-1 degen akti toltyrylatyn bolady. Sonyń negizinde qaıtys bolǵan jigittiń ákesine ótemaqy tólenedi. Onyń kólemi qosymsha naqtylanady. Sodan keıin barlyq qujattar Polıtsııa departamentine tergeýshige ótkiziledi. Kináli tulǵalarǵa qatysty tıisti sharalardy polıtsııa qyzmetkerleri qabyldaıtyn bolady», - deıdi Sársenbaı Teńlesbaı.

Eske salaıyq, oqys oqıǵa 7-shi maýsym kúni Shymkenttiń irgesindegi eldi mekenderdiń birinde bolǵan edi. Gaz jınaqtaý stansasynda qatty jarylys bolyp, sol jerde jumys isteıtin 20 jastaǵy qyzmetkerdiń denesiniń 98 paıyzyn kúıik shalǵan. Artynsha ol úsh kúnnen keıin aýrýhana tóseginde jan tapsyrdy.