Elmıra Sýhanberdıevaǵa qatysty sot úkimi shyqty

NUR-CULTAN. QazAqparat - Nur-Sultan qalasynyń Esil aýdandyq sotynda QR Bilim jáne ǵylym vıtse-mınıstri bolǵan Elmıra Sýhanberdıevaǵa qatysty sot úkimi shyqty, dep habarlaıdy QazAqparat tilshisi.

Atap aıtqanda, burynǵy vıtse-mınıstrge qatysty aqshalaı aıyppul taǵaıyndaldy. E. Sýhanberdıeva sot zalynda bosatyldy.

Oǵan 2500 AEK kóleminde aıyppul taǵaıyndaý sheshimi shyǵaryldy. Jalpy, ol 5 948 900 teńgeni tóleýge mindetteldi. Sonymen qatar, ómir boıyna memlekettik qyzmette, sotta, Ulttyq bankte, jergilikti ózin-ózi basqarý organdarynda jáne memleket úlesi 50% asatyn ózge de memlekettik uıymdarda - ulttyq holdıngter, ulttyq damý ınstıtýttarynda jumys isteý quqyǵynan aıyryldy.

Budan bólek, Elmıra Sýhanberdıevany «Eren eńbegi úshin» medalinen aıyrý týraly Prezıdentke usynym engizildi.

Budan buryn habarlanǵandaı, Elmıra Sýhanberdıeva sybaılas jemqorlyq kúdigimen ustaldy jáne 2 aıǵa qamaýǵa alyndy.

QR Sybaılas jemqorlyqqa qarsy is-qımyl ulttyq bıýrosy Elmıra Sýhanberdıevaǵa qatysty sotqa deıingi tergeý amaldaryn bastady.

9 shilde kúni sot otyrysy ótip, ol óz kinásin moıyndady.