Shymkentte kásipker men onyń áıelin óltirgen júrgizýshige sot úkimi shyqty

ShYMKENT. QazAqparat - Shymkentte kásipker men áıelin óltirgen 28 jastaǵy aıyptalýshy sottaldy, dep habarlaıdy QazAqparat tilshisi.

Qalalyq qylmystyq ister jónindegi mamandandyrylǵan aýdanaralyq soty marqumdardyń júrgizýshisi bolyp istegen jigitti 25 jylǵa bas bostandyǵynan aıyrdy.

Ol Qylmystyq kodekstiń úsh babymen sottalǵan. «Aıyptalýshy Ersultan Qulahmetov Qylymystyq kodekstiń 287-baby 3-i bóligi, 99 baptyń 2-shi bóligi 1 jáne 8 tarmaǵy, 192 baptyń 3-shi bóligi 2-shi tarmaǵy boıynsha kináli dep tanylǵan. Endi jazasyn qaýipsizdigi barynsha qatańdatylǵan túzeý mekemesinde óteıtin bolady», - delingen habarlamada.

Eske salsaq, buǵan deıin Shymkentte kásipker men áıelin óz úıinde óltirip ketkenin jáne kúdikti qylmyskerdiń ustalǵany týraly habarlaǵan bolatynbyz.