BQO-da tamaq ónimderinen qaýipti mıkrobtar tabyldy
2018 jylǵy 22 qarasha 20:34

BQO-da tamaq ónimderinen qaýipti mıkrobtar tabyldy

ORAL. QazAqparat - Batys Qazaqstan oblysynda tamaq ónimderinen qaýipti mıkrobtar tabyldy, dep habarlaıdy QazAqparat tilshisi.

BQO qoǵamdyq densaýlyq saqtaý departamentiniń bólim basshysy Gúlbaqyt Naýrzalınanyń aıtýynsha, óńirde monıtorıng júrgizý barysynda ónimderdiń sanıtarlyq talaptarǵa saı kelmeıtini anyqtaldy.

Atap aıtqanda, «Kolesnıkova V.F» JK (Oral qalasy, «Novınka» tartylǵan eti) men Orynbor oblysy «Anakın D.S» JK (Pokýronovskıı tartylǵan eti) óndirgen jartylaı fabrıkattardan ishek taıaqshalary tobynyń bakterııalary tabyldy. Oǵan qosa departament qyzmetkerleri jergilikti óndirýshi «Kolesnıkova V.F» JK-nyń tutynýshylardy aldaǵanyn anyqtady, munda shoshqanyń DNQ-sy da shyqqan.

Sol sekildi Terekti aýdanynda «Kııasova Ý.M» JK-nyń «Dlıa vas» jáne Aqsaı qalasynda «Kanafeev» JK-nyń «Rasýl» dúkenindegi ónimderdiń merzimi ótip ketkeni belgili boldy.

Oral qalasynda «Ideal Market» JShS-nyń «Lıder» dúkeninde Aqmola oblysy Aqmol aýylyndaǵy «CapitalProjectsLTD» JShS óndirgen muzdatylǵan «Kýrochka rıaba» broıler balapanynan salmonella shyqty. Sondaı-aq «Shaǵala» dúkeninde Almaty oblysy Іle aýdany Chapaev aýylyndaǵy «Alataý Qus» AQ óndirgen broıler-balapannan da Salmonella tektes mıkrobtardyń DNQ-sy tabyldy.

«Qazirgi kezde oblysta sanıtarlyq talapqa saı kelmegen ónimderdi tárkileý jáne joıý jumystary júrgizilip, zerthanalyq baqylaý kúsheıtilýde», dedi QazAqparat tilshisine G.Naýrzalına.

Jańalyqtar

MURAǴAT