Reseıden jetkiziletin et ónimderinen zııandy mıkroaǵzalar tabyldy

ASTANA. QazAqparat - Azyq-túlikke júrgizilgen monıtorıngtik zertteýlerden keıin QR Aýyl sharýashylyǵy mınıstrligi birqatar óndirýshilerdiń ónimine qatysty ýaqytsha shekteýler qoıdy, dep habarlaıdy QazAqparat tilshisi.

Atap aıtqanda, «Stavropolskıı broıler» JAQ óndirgen «Blagoıar» atty broıler balapany qanattarynyń satylymyna shekteý qoıylǵan. Munda mezofıldi aerobty jáne qosymsha anaerobty mıkroaǵzalardyń kólemi shekten tys kóp ekeni anyqtalǵan.

Sondaı-aq, Reseıdiń Saratov oblysynda ornalasqan «SPK «Kýrnıkov» AAQ ónimderiniń árbir partııasynan synama alyp, qatań zerthanalyq tekserýden ótkizip turý jóninde sheshim qabyldandy. Bul kásiporynnyń tartylǵan etin zerttegen kezde mezofıldi aerobty jáne qosymsha anaerobty mıkroaǵzalardyń mólsheri normadan kóp ekeni belgili boldy.

Munyń aldynda QR AShM veterınarlyq-sanıtarlyq talaptarǵa saı bolmaǵany úshin mynadaı kompanııalardyń ónimin kirgizýge ýaqytsha shekteý qoıǵan bolatyn: «FınInvest» AAQ - Chelıabi oblysy, «Mıkoıanovskıı mıasokombınat» JAQ - Máskeý qalasy, «Prıoskole» JAQ - Belgorod oblysy, «Chebarkýlskaıa ptıtsa» AAQ - Chelıabi oblysy, «Brıanskıı broıler» AAQ - Brıansk oblysy, «Magnıtogorskıı ptıtsevodcheskıı kompleks» AAQ, «Tokarevskaıa ptıtsefabrıka» AAQ, «Altaıskıı broıler» AAQ jáne «Raskovskıı molzavod» kásiporny.

Aıta ketý kerek, mezofıldi aerobty jáne qosymsha anaerobty mıkroaǵzalardyń mólsherden tym kóp bolýy atalmysh ónimdi buzatyn mıkroaǵzalardyń kóbeıip jatqanynan habar beredi.