«ArselorMıttal Temirtaýdaǵy» apat boıynsha komıssııa qorytyndysy shyqty
2022 jylǵy 24 maýsym 14:57

«ArselorMıttal Temirtaýdaǵy» apat boıynsha komıssııa qorytyndysy shyqty

QARAǴANDY. QazAqparat – Memlekettik komıssııa tórt jumysshy qaza tapqan «ArselorMıttal Temirtaý» AQ-daǵy jazataıym oqıǵanyń sebepterin atady. Oqıǵa jumys berýshiniń kinásinen bolǵany anyqtaldy, dep habarlaıdy QazAqparat tilshisi.

«Saraptamalyq uıymdar apatqa sebep bolýy múmkin aqaýlar men zaqymdanýlardy anyqtady. Sondaı-aq, tapsyrys berýshi «Qurylysmet» pen merdiger «ArselorMıttal Temirtaý» qurylys-montajdaý jumystaryn júrgizý qaýipsizdigin qamtamasyz etpegeni belgili boldy. Jobalaý qujattamasy bekitilmegen. Óndiris jobasy men peshti bólshekteýdiń tehnologııalyq kartasy saraptamalyq komıssııalardyń qaraýyna usynylmaǵan. Arnaıy tergeý qorytyndysy boıynsha komıssııa jumys berýshiniń júz paıyz kinásin anyqtady», - dedi memlekettik komıssııa tóraǵasy, Qaraǵandy oblysy boıynsha bas memlekettik eńbek ınspektory Irına Lıýbarskaıa óńirlik kommýnıkatsııalar qyzmetinde ótken brıfıngide.

Tergeý komıssııasyna jergilikti atqarýshy organdardyń, kásipodaqtyń, jumys berýshiniń ókilderi jáne saraptama uıymdary kirdi. Komıssııa eki aptaǵa jýyq ýaqyt ishinde oqıǵa ornyn tekserdi, tehnıkalyq jáne normatıvtik qujattardy zerttedi, qatysy bar adamdarmen, kýágerlermen suhbattasty.

Anyqtalǵanyndaı, jumysshylar jetkilikti dárejede bilikti, ıaǵnı 5 jáne 6-razrıadtary bolǵan. Biraq, olar úsh kún qatarynan aýysymsyz demontaj jasaǵan. Qaıǵyly oqıǵa jóndeý jumysynyń aıaqtalýyna 25% qalǵanda, ıaǵnı sońǵy kúni bolǵan.

Tergeý barysynda 32 adam suraýǵa alyndy. 14 kúdikti anyqtaldy, onyń ishinde basshylyq quram da bar. Materıaldardyń kóshirmeleri aýmaqtyq polıtsııa organyna jiberiledi.

Esterińizge sala keteıik, 10 maýsymda «Qurylysmet» JShS («ArselorMıttal Temirtaý» AQ enshiles kásiporny) master-press tsehynyń jumys istemeıtin №9 termııalyq peshinde otqa tózimdi qurylysty bólshekteý kezinde shatyr opyrylyp qulaǵan. Jóndeý tsehynyń 5 jumysshysy úıindi astynda qaldy. Onyń tórteýi kóz jumyp, bireýi aýrýhanaǵa jetkizildi.

Qazir tseh konservatsııalanǵan, onda eshqandaı jumys júrgizýge bolmaıdy. Injenerlik ınfraqurylymǵa kirýge de tyıym salynǵan.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT