Armenııaǵa munaı ónimderin jetkizýge qatysty talaptar aıqyndaldy
2022 jylǵy 4 mamyr 12:11

Armenııaǵa munaı ónimderin jetkizýge qatysty talaptar aıqyndaldy

NUR-SULTAN. QazAqparat – Májilistiń jalpy otyrysynda «Qazaqstan Respýblıkasynyń Úkimeti men Armenııa Respýblıkasynyń Úkimeti arasyndaǵy Armenııa Respýblıkasyna munaı ónimderin berý salasyndaǵy saýda-ekonomıkalyq yntymaqtastyq týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

«2014 jylǵy 29 mamyrdaǵy Eýrazııalyq ekonomıkalyq odaq týraly shartqa sáıkes, EAEO-nyń munaı jáne munaı ónimderiniń ortaq naryǵyn qalyptastyrý týraly halyqaralyq shart qabyldanǵanǵa deıin, Eýrazııalyq ekonomıkalyq odaqqa múshe memleketter arasynda munaı jáne munaı ónimderin jetkizý jekelegen ekijaqty kelisimdermen retteledi. 2020 jylǵy 16 shildede Nur-Sultan qalasynda Armenııa Respýblıkasyna munaı ónimderin berý salasyndaǵy saýda-ekonomıkalyq yntymaqtastyq týraly kelisimge qol qoıyldy. Taraptar memleketteriniń sharýashylyq júrgizýshi sýbektileriniń ýákiletti uıymdardy tarta otyryp, Qazaqstan aýmaǵynan Armenııaǵa jetkizilimderdi júzege asyrýy úshin Taraptar qajetti jaǵdaılar jasaıdy. Ózderińizge belgili, Eýrazııalyq ekonomıkalyq odaq elderi arasyndaǵy saýda eksporttyq kedendik baj salyǵyn tólemeı, kedendik baqylaýsyz júzege asyrylady», - dedi QR Energetıka mınıstri Bolat Aqsholaqov.

Onyń aıtýynsha, osy kelisimde munaı ónimderi saýdasynyń is júzindegi erekshe rejımi belgilengen jáne Qazaqstannan Armenııaǵa munaı ónimderin áketý kezindegi baqylaý tetikteri qamtylǵan. Osyndaı tetikter artyq munaı ónimderin Armenııanyń neǵurlym artyqshylyqty naryǵynda ótkizýge múmkindik beredi, bul munaı ónimderiniń ishki teńgerimine oń áser etedi jáne Qazaqstannyń sharýashylyq júrgizýshi sýbektileriniń túsimin arttyrady.

«Sondaı-aq Qazaqstan Respýblıkasynan munaı ónimderin áketýdi retke keltiredi jáne ishki naryqty Eýrazııalyq ekonomıkalyq odaq elderine munaı ónimderiniń baqylaýsyz aǵynynan qorǵaıdy. Bul rette, qajet bolǵan jaǵdaıda, Kelisimde Qazaqstan ulttyq qaýipsizdikti qamtamasyz etý jáne ishki naryqty qorǵaý maqsatynda ındıkatıvtik teńgerimdermen bekitilgen kólemder asyp ketken jaǵdaıda, fors-major jaǵdaılarynda, sondaı-aq Armenııa óz aýmaǵynan qazaqstandyq munaı ónimderin úshinshi elderge jáne EAEO elderine áketý tyıymy boıynsha mindettemelerin buzǵan kezde, Qazaqstan birjaqty tártippen Armenııaǵa munaı ónimderin bajsyz jetkizýdi toqtata alady nemese shekteı alatyny kózdelgen. Sondyqtan bizdiń ishki naryǵymyz úshin táýekelder joq», - dedi mınıstr.

Atap aıtqanda, qujat aıasynda Qazaqstannyń ishki naryǵyn munaı ónimderimen qamtamasyz etý basty basymdyq bolyp sanalatynyn atap ótken jón.

«Munaı ónimderiniń jekelegen túrlerin óndirýdi jáne olardyń aınalymyn memlekettik retteý týraly» Zańǵa sáıkes, mınıstrlik aı saıyn ishki naryqqa qaıta óńdeý úshin munaı jetkizý josparyn bekitedi jáne artyq munaı ónimderi bolǵan jaǵdaıda, Armenııaǵa osyndaı jetkizilimder júzege asyrylatyn bolady», - dedi Bolat Aqsholaqov.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT