Arızona ýnıversıtetimen birlesip maman daıarlaımyz - Eraly Toǵjanov
2022 jylǵy 20 mamyr 12:34

Arızona ýnıversıtetimen birlesip maman daıarlaımyz - Eraly Toǵjanov

NUR-SULTAN. QazAqparat – 2025 jylǵa qaraı kezeń-kezeńimen jastarǵa tehnıkalyq jáne kásiptik bilim berý tolyǵymen tegin bolady.

Bul týraly Senattaǵy jastardy qoldaý taqyrybyna arnalǵan parlamenttik tyńdaýda Premer-Mınıstrdiń orynbasary Eraly Toǵjanov málim etti, dep habarlaıdy QazAqparat tilshisi.

«Elimizde 490 myńǵa jýyq jas kolledjderde bilim alýda. Búginde olardyń 40%-dan astamy aqyly negizde oqyp jatyr. 2025 jylǵa qaraı kezeń-kezeńimen jastarǵa tehnıkalyq jáne kásiptik bilim berý tolyǵymen tegin bolady. Bıyldyń ózinde osy maqsatta 45 myń qosymsha grant bólindi. Kolledjderdegi bilim berýdi eńbek naryǵyna beıimdeý úshin akademııalyq erkindik engizildi. Oqý baǵdarlamalary tolyǵymen jańartyldy», - dedi E. Toǵjanov.

Sonymen qatar ol el aýmyǵynda ashylyp jatqan shetel oqý oryndarynyń fılıaldary týraly aıtty.

«Joǵary oqý sapasy senatorlar tarapynan ótkir kóterilip júrgen suraqtardyń biri. Bul salada básekege qabilettilikti arttyrý úshin álemdik úzdik ýnıversıtetter fılıaldaryn elimizde ashý qolǵa alyndy. Byltyr Almaty qalasynda brıtandyq De-Monfort ýnıversıtetiniń fılıaly quryldy. Jańa oqý jylynan bastap M.Qozybaev atyndaǵy Soltústik Qazaqstan memlekettik ýnıversıtetinde Arızona ýnıversıtetimen birlesip maman daıyndaý jobasy iske qosylady.

Bul jastarǵa shetelge shyqpastan, álemdik reıtıngte aldyńǵy qatarda turǵan ýnıversıtetterde bilim alýǵa, ata-analarǵa shyǵyndaryn aıtarlyqtaı únemdeýge múmkindik beredi», - dedi Úkimet basshysynyń orynbasary.

Osyǵan deıin Arızona ýnıversıtetimen birlesken joba boıynsha kelissóz júrgizilgeni habarlanǵan edi.

Budan buryn habarlanǵandaı, Senat tóraǵasy M. Áshimbaev barlyq reformanyń túpki maqsaty jastardyń ál-aýqatyn arttyrýǵa ári olardyń damýyna jaǵdaı jasaýǵa arnalǵanyn atap ótti.

Sonymen qatar ol ýnıversıtet bitirgen túlekterge eńbek naryǵynda suranys joq ekenin aıtty.



Uqsas jańalyqtar
Avtor:
Tilshi

Jańalyqtar

MURAǴAT