ArHO-2022: qazaqstandyq mergender men artıllerıster kósh basynda
2022 jylǵy 17 tamyz 07:29

ArHO-2022: qazaqstandyq mergender men artıllerıster kósh basynda

NUR-SULTAN. QazAqparat – Halyqaralyq Armııa oıyndary sheńberindegi jarystar qarqyn aldy. Polıgondarda álemniń túrli elderinen jınalǵan áskerı qyzmetshiler sheberligin kórsetip jatyr, dep habarlaıdy QazAqparat QR Qorǵanys mınıstrligine silteme jasap.

Vedomstvonyń baspasóz qyzmeti taratqan aqparatqa sáıkes, Qaraǵandy oblysynyń «Spassk» oqý-jattyǵý ortalyǵynda ótip jatqan «Taktıkalyq mergen» baıqaýynyń birinshi kezeńinde qazaqstandyq atqyshtar sátti óner kórsetti. «Biliktilik», «Jaralylardy evakýatsııalaý» jáne «Qorǵanys» jattyǵýlarynda elimizdiń áskerı qyzmetshileri Ózbekstan men Qytaı komandalaryn artta qaldyrdy. Jeke esepte qazaqstandyq jaýyngerlerge teń keler eshkim bolmady dese bolady. Maıor Arman ıAkýbov úzdik atansa, ekinshi oryndy leıtenant Rýslan Moldabaev, úshinshi oryndy kapıtan Dáýlet Qulmahanov ıelendi.

Jambyl oblysynyń «Gvardeısk» polıgonynda ótip jatqan «Artıllerııadan oq atý sheberleri» mınaatqysh eseptoptarynyń jarysynda qazaqstandyq komanda aıqyn jeńiske jetti. Birinshi kezeńniń jeke jarysynda bizdiń artıllerıster barlyq tapsyrmalardy sátti oryndap shyqty. Kórsetkish ýaqyty – 15 mınýt 53 sekýnd. Ekinshi oryndaǵy reseılik áskerı qyzmetshilerdiń nátıjesi – 18 mınýt 17 sekýnd. Úshinshi oryndy ıelengen Belarýs mınoaatqyshtarynyń nátıjesi – 22 mınýt 16 sekýnd. Túngi sprıntte de 10 mınýt 33 sekýnd nátıjesimen Qazaqstan úzdik atandy. Márege ekinshi bolyp 14 mınýt 15 sekýndpen Ázerbaıjannyń áskerı qyzmetshileri keldi. Reseıden kelgen artıllerısterdiń kórsetkishi – 16 mınýt 01 sekýnd.

Aqmola oblysyndaǵy «Amandyq» oqý-jattyǵý polıgonynda «Merıdıan» áskerı topograftar konkýrsyna qatysýshylar birinshi kezeńniń qorytyndysy boıynsha atys qarýynan atýdy oryndady. Bul saıysta Ózbekstannyń áskerı qyzmetshileri kósh bastap tur. Ekinshi orynda – Vetnam úshinshi orynda – Qazaqstan komandalary. Alda – kásibı daıyndyq kezeńderi. Munda bizdiń áskerı qyzmetshilerge nátıjelerin jaqsartýǵa múmkindik bar.

Kabardıno-Balkarııada ótip jatqan «Elbrýs sheńberi» saıysynda áskerı alpınıster jasandy relefte jeke órmeleý jattyǵýlaryn oryndady. Jattyǵý nátıjeleri boıynsha Qazaqstan komandasy Reseı, Ózbekstan, Úndistan jáne Qytaı alpınısterinen keıingi besinshi orynǵa jaıǵasty. Alda olardy taýdaǵy eń kúrdeli jáne jaýapty kezeń kútip tur. Onda konkýrstyń jeńimpazy men júldegerleri anyqtalatyn bolady.


Foto: www.gov.kz

Uqsas jańalyqtar
Seriktester jańalyqtary

Jańalyqtar

Úrdis

MURAǴAT