Árbir qylmystyq istiń artynda adam taǵdyry tur – qyzylordalyq úzdik tergeýshi
2022 jylǵy 23 maýsym 20:12

Árbir qylmystyq istiń artynda adam taǵdyry tur – qyzylordalyq úzdik tergeýshi

QYZYLORDA. QazAqparat - Qyzylordalyq polıtsııa aǵa leıtenanty Sultan Rysbaı bes jyldan beri tergeýshi qyzmetin atqarady. Ol búginge deıin 100-den astam qylmystyq isti ashyp, sotqa joldady, dep habarlaıdy QazAqparat tilshisi.

23 maýsym – Polıtsııa kúni qarsańynda tergeýshi qyzmetin atqaratyn Sultan Rysbaıdy áńgimege tartqan edik.

- Sóz basynda óziń jaıly aıta ketseńiz...

- Men Qyzylorda qalasynda týyp-ósip, Qyzylorda qalasyndaǵy №217 orta mektepte bilim aldym. Odan keıin Qorqyt ata atyndaǵy Qyzylorda memlekettik ýnıversıtetinde bilim aldym. Eńbek jolymdy Qyzylorda qalasyndaǵy Aqsaı polıtsııa bóliminde tergeýshi qyzmetinen bastadym. Búginde qalalyq polıtsııa basqarmasynyń tergeý bóliminiń aǵa tergeýshisimin.

- Tergeýshi bolý ońaı emes. Eńbek jolynda qylmystyq isti ashýda qandaı qıyndyqtar kezdesti ?

- Tergeýshi qyzmeti – jaýapty mindet. Aqsaı polıtsııa bóliminde eńbek jolymdy bastaǵan sátte biraz qıyndyqtar kezdesti. Aqsaı aýmaǵy qalamyzdaǵy eń krımınogendi aımaq sanalady. Onda 102 nómirine kúnine 20-ǵa jýyq habarlama túsip turatyn. Habarlama negizinde jedel tergeý tobynyń quramynda kezekshi tergeýshi retinde oqıǵa ornyna talaı márte bardym. Kúnde túrli adamdardy, túrli taǵdyrlardy kóresiń. Osylaısha shyńdaldym, tájirıbe jınadym, tergeýshi retinde de, qarapaıym tulǵa retinde ósip-jetildim.

- Qyzmettegi jetistikteriń týraly aıtyp ótseńiz ?

- Árbir isime jaýapkershilikpen qaraýǵa tyrysamyn. Sonyń nátıjesi bolar, 2020 jyldyń qorytyndysymen «Oblystyń úzdik tergeýshisi» atanǵan edim. Qazirge deıin 100-den asa aýyr, asa aýyr sanattaǵy urlyq, alaıaqtyq, múlikti talan-tarajǵa salý, esirtkige qatysty qylmystardy tergedim. Olardy naqty aıǵaqtar arqyly sotqa joldadym.

- Qylmystyq isterdi júrgizý barysynda qandaı talaptarǵa arqa súıeısiń ?

- Árbir qylmystyq istiń artynda bir adamnyń taǵdyry tur. Sondyqtan oǵan beı-jaı qaraýǵa bolmaıdy. Men qylmystyq is boıynsha kinálini aıǵaqpen tolyq dáleldeýge nazar aýdaramyn. Sot úkimi shyqqan kezde ǵana jumystyń tolyq aıaqtalǵanyn sezinemiz.

- Ózińizdiń otbasyńyz jaıly aıta ketseńiz...

- Aldymen ákem Jalǵas Júsipov jaıynda aıta keteıin. Ol kisi ishki ister organdarynda 20 jyldan astam ýaqyt boıy abyroıly qyzmet etti. Qazir zeınetkerlik demalysta. Bala kezimde ákeme qarap boı túzedim.

Qazaqta mamandyq jáne jar tańdaýdan qatelesýge bolmaıdy degen qaǵıda bar ǵoı. Men sol eki tańdaýda da qatelespegen baqytty janmyn dep esepteımin. Kelinshegim Qazyna Erbolqyzy Qýanyshbek te ishki ister organdarynda qyzmet etedi, ýchaskelik polıtsııa ınspektorynyń kómekshisi. Qazirgi tańda bala kútimine baılanysty demalysta. Jumystan kelgende sharshaǵanymdy basatyn qyzym jáne ulym bar.

- Áńgimeńizge raqmet! Qyzmette tabystar tileımin!.

Sondaı-aq, budan buryn Qyzylordada úsh býynǵa jalǵasqan polıtseıler áýleti bar ekenin jazǵan edik.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT