+7 (701) 759 90 19
USD 412.55 EUR 454.18
RUB 5.81 CNY 57.66
Jańalyqtar

Arbaǵa tańylǵan erli-zaıyptylar: Kóńiliń kemtar bolmaýy kerek

2020 jylǵy 29 naýryz 10:14
Bólisińiz:
Arbaǵa tańylǵan erli-zaıyptylar: Kóńiliń kemtar bolmaýy kerek

ZAISAN. QazAqparat – Shyǵys Qazaqstan oblysy Zaısan aýdanynda bes kúndik dúnıeniń synaǵyna qaısarlyq pen tózimdilik tanyta bilgen erli-zaıyptylar turady. Ekeýi de І top múgedegi Ójetbek Májenuly men Gúlnar Ihaıqyzy bir shańyraqtyń shamyn jaǵyp, tútinin tútetip kele jatyr. Bir-biriniń júrek muńdaryn shynaıy túsinetin olar uly sezim – mahabbattyń arqasynda taǵdyr talqysyna moıymaı, aldaǵy kúnge zor úmitpen qaraıdy.

Ójetbektiń ór minezi

Zaısan aýdany Keńsaı aýylynyń turǵyny Ójetbek Májenuly 2007 jyly Qytaıdan atamekenine oralǵan. 23 jasynda úılengen azamat bir ul, úsh qyzdyń ákesi atanady.

«Buryn Qytaı qalalarynyń birindegi ákimshilikte kólik júrgizýshisi bolyp jumys istegen edim. Sondaı kúnderdiń birinde 2005 jyly kóligimdi toqtata bergende tutqıyldan bir kólik kelip soqtyǵysty. Ol kezde 28 jasta edim. Jol apatynan moıyn omyrtqama zaqym keldi. Sóıtip, tósekten tura almaı jatyp qaldym. Arada eki jyl ótkende atajurtqa oraldyq, alaıda keleńsiz jaıttardan soń birinshi jubaıymmen ajyrastym. Balalarym óz qolymda qaldy», – dep eske aldy ol.

«Jalǵyzdyq Qudaıǵa ǵana jarasady» demekshi, Ójetbektiń synyptasy sebepshi bolyp, keıipkerimiz qazirgi jubaıymen tanysqan. Arada úlken syılastyq pen shynaıy sezimniń oty laýlap, ekeýi qalǵan ǵumyrlaryn qol ustasyp birge ótkizýge sóz baılasady. «Qýanyshty bólisseń – kóbeıedi, qaıǵyny bólisseń – azaıady» degendeı, bir-birine ómirlik serik bolǵan olar taǵdyrdyń aysyn da, tuysyn da birge tatyp keledi.

Januıanyń otaǵasy men otanasy birinshi toptaǵy múgedek jandar bolǵandyqtan, memleket tarapynan aı saıyn járdemaqy alady. Budan bólek, olarǵa aýdan ákimdigi taǵaıyndaǵan jeke kómekshi kelip, úı sharýasyna qolǵabys tıgizip turady eken.

Eki jarty – bir bútin

Ójetbektiń shańyraǵynyń jylýyn kirgizip, meıirimin tógip otyrǵan Gúlnar Ihaıqyzy endi ǵana teń qurbymen boı túzep kele jatqan shaǵynda aıaq astynan attan qulap, julynyna zaqym keltirip alǵan. Jyly júzimen úıdiń shyraıyn keltiretin Gúlnardyń januıasy Mońǵolııa elinen Taldyqorǵanǵa 1991 jyly kóship kelipti. 17 jasynda múgedek arbasyna tańylǵan Gúlnar eshqaıda shyqpaı, bar ýaqytyn anasynyń qasynda ótkizgen. Bir Alladan ǵana duǵa tilep otyratyn kóńili qardaı appaq áıel bolashaqta em-domnyń saýaby bolatynynan da úmitti, árıne.

«Men Ójetpekpen 2015 jyly Taldyqorǵandaǵy synyptasy arqyly tanystym. Basynda telefonmen sóılesip júrdik. Alǵashynda bir-birimizden tym alysta turatyndyǵymyzdy aıtyp eki jaqtaǵylar da qarsy boldy. Apaılarym men aǵalarym «Qınalyp qalasyń ǵoı, qajet emes-aý» dep eki jarty bir bútin bolyp qosylýymyzǵa qarsylyq bildirdi. Balalary bar ekendigin aıtyp, olardyń kózqarasy qalaı bolatyndyǵyn ýaıymdady. «Qol qýsyryp qarap otyrǵan adam Allaǵa da jaqpas» deıdi ǵoı, eń bolmasa azamattyń bir sháýgim sháıin qaınatyp bereıin dep bekindim», – deıdi Gúlnar Ihaıqyzy.

Aq halatty abzal jandar otaǵasyna «Ýaqytymen em júrgizse, nátıje shyǵýy múmkin» dep aıtqan eken. Osydan keıin Ójetbek Nur-Sultan qalasynda bir jarym jylǵa jýyq emdelip, qazir qarajat tapshylyǵynan amalsyz emin toqtatqan. Jyldan asa júrgizilgen emniń arqasynda Ójetbek qazir aqyryn qozǵalyp, arbaǵa otyratyn bolǵan. Emin taǵy da jalǵastyryp, shıpasy tabylsa aıaǵynan tik turyp, el qatarly júrýge áli de bolsa úmiti bar.

«Elordada aýrýhanada jatqanymda qasymdaǵy ózim sııaqty taǵdyrlas adamdarmen kezdesip, rýhanı kúsh aldym. Eń bastysy, kóńiliń kemtar bolmaýy kerek. Kerbez kóńildi shań basyp, qara bult úıirilgende, janyńa jaqyn jandar rýhanı demeý berse qıyndyqty ońaı eńserýge bolady», – deıdi qaısar azamat.

Júrek syryn jyrmen jetkizedi

Jastaıynan óleń jazyp, ishki sezim-tolǵanysyn qaǵaz betine túsirip úırengen Ójetbek aıaýly jaryna degen sezimin de óleń joldarymen kesteleıdi. Biz onyń óleńderinen júregine úmit shyraǵyn jaǵyp, jasyǵan kóńilin qaıta jandandyrǵan aıaýly jaryna degen káýsar sezimin ańǵardyq.

*

(Ójetbektiń bir óleńinen úzindi)

Kúnsiń sen nuryńdy shashqan,

Tún yzǵarynyń shyqtary qashqan.

Túnegime janym aı bolyp kelip,

Júregime úmit shyraǵyn jaqqan.

Jaraly júrek, jasyǵan kóńil,

Oıatty meni sezimiń maqpal.

Ormanym tolqyp, japyraq jaıdy,

Tasyndy kóńil aǵyl da tegil.

Talǵatjan Muhametbekuly


Bizdiń kanalymyzǵa jazylyńyz:

Basty sózder: Shyǵys Qazaqstan oblysy, Qoǵam,
Bólisińiz:

Avtor:

Talǵatjan Muhametbekuly

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Erbol Janat
Erbol Janat
954-059
REDAKTOR
Janıbek Amangeldı
Janıbek Amangeldı
954-059

MURAǴAT