Ár adam jeke basqa emes, ulttyq múddege qyzmet etýge talpynýy kerek – Erlan Qoshanov
2022 jylǵy 16 maýsym 16:18

Ár adam jeke basqa emes, ulttyq múddege qyzmet etýge talpynýy kerek – Erlan Qoshanov

ULYTAÝ. QazAqparat – Ozyq zamanaýı úrdisterdi úlgi tutqan jańa saıası mádenıet qalyptastyrý – Jańa Qazaqstandy qurýdyń alǵysharty. Bul týraly Ulytaý oblysynda ótip jatqan Ulttyq quryltaıdyń otyrysynda Májilis tóraǵasy Erlan Qoshanov aıtty, dep habarlaıdy QazAqparat tilshisi.

«Jańa Qazaqstandaǵy qoǵamnyń birigýi men jumylýynyń bir arnaǵa toǵysýynyń asa qajet ekeni daýsyz. Ol – ýaqyt talaby! Biraq, mártebesi bıik, mańyzy tereń bul is qandaı negizde júzege asady? Qoǵamnyń jańa rýhanı bolmysy men etıkalyq ustanymy qandaı bolmaq? Búgingi tańda bul suraqtardyń mańyzdylyǵyn joqqa shyǵarýǵa bolmas! Óıtkeni, qazaqstandyqtardy joǵary ulttyq qundylyqtar men demokratııalyq saıası dástúr negizinde ǵana toptastyrýǵa bolady.

Referendýmnyń shyńy men shyndyǵy bizge kem degende úsh naqty mindet pen maqsat qoıyp otyr», - dedi E. Qoshanov.

Osy oraıda ol birinshi kezekte tártip pen zańdylyqtyń mańyzdylyǵyn atady. Ádiletti Qazaqstan ornatýdyń basty sharty – zań ústemdigin ornyqtyrý, qoǵamda quqyqtyq mádenıet qalyptastyrý.

«Bul turǵydan da elimizde kóptegen máseleler qordalanyp qaldy. Baýyrjan Momyshulynyń «Tártipsiz el bolmaıdy, tártipke baǵynǵan qul bolmaıdy» degen sózin ósıet etip ustansaq artyq bolmas. Qazirgi zańnama boıynsha árkimniń zańdy túrde mıtıng nemese beıbit sherý ótkizýge haqysy bar. Mıtıng degen kúndelikti ómirdiń kórinisine aınaldy. Alaıda keıbir azamattar óziniń pikirin bildirý kezinde zań aıasynan asyp ketetin is-áreketterge barady», - dedi Májilis tóraǵasy.

E. Qoshanov ekinshi mindet retinde jańa qoǵamdyq sanany atap ótti.

«Jańa Qazaqstanda jańa qoǵamdyq oı-sana qalyptastyrýymyz kerek.

Bul barshamyzdy mezi qylǵan jasandylyqtan, bıýrokratızmnen, jalǵandyqtan, pafostan jırenip, ádilet pen adaldyq jaǵyna birjolata shyǵýymyzdy talap etedi. Parlamenttiń de, partııalardyń da basty mindeti – elde bolyp jatqan oń ózgeristerdi halyqqa jetkizý, jas urpaqtyń boıyna sińirý! Biz Prezıdent kórsetken saıası mejege, reformalardyń qarqynyna ilesip, jańa jaǵdaıda jumys isteýge beıimdelýimiz qajet. Osy oraıda «Kúshti Prezıdent – yqpaldy Parlament – esep beretin Úkimet» qaǵıdasy «jaýapty qoǵam men jaýapty azamat» formýlasymen úndesip tur», - dedi ol.

«Úshinshi kezekte – jańa saıası mádenıet. Ozyq zamanaýı úrdisterdi úlgi tutqan jańa saıası mádenıet qalyptastyrý – Jańa Qazaqstandy qurýdyń alǵysharty. Elimizde konstrýktıvti mádenıet, pikirtalas mádenıetin qalyptastyrýǵa tıispiz. Ár adam jeke basqa emes, ulttyq múddege qyzmet etýge talpynýy kerek. Quryltaı osy saıası mádenıetti jańa deńgeıge kóteredi dep bilemiz», - dedi Májilis tóraǵasy.


Seriktester jańalyqtary

Jańalyqtar

Úrdis

MURAǴAT