Apple qazaqstandyq oqýshyny dombyra shertýdi úıretetin baǵdarlama úshin marapattady

ATYRAÝ. QazAqparat –Atyraýda Nazarbaev Zııatkerlik mektebiniń oqýshysy dombyra shertýdi úıretetin baǵdarlama jasap, Apple kompanııasynan dıplom aldy, dep habarlaıdy QazAqparat.

Asqar Álmuhametov bıyl Nazarbaev Zııatkerlik mektebiniń 10-synybyna barady. Ol dombyra shertýdi úıretetin sımýlıator jasap, ony Apple kompanııasy uıymdastyrǵan baıqaýǵa joldaǵan.

«Áıgili Stıv Djobs negizin qalaǵan Apple kompanııasy baǵdarlama jasaýmen aınalysatyn jastardy yntalandyrý úshin jyl saıyn ınnovatsııalyq jobalar baıqaýyn ótkizedi. Konkýrstyń sharty boıynsha áýeli úzdik jumystar irikteledi. Odan soń kompanııa ókilderi jobanyń avtorlarymen baılanysqa shyǵady. Men bul konkýrsqa dombyra tartýdy úıretetin sımýlıatordy usyndym. Sımýlıator Swift baǵdarlamasymen jasaldy», - deıdi Asqar Álmuhametov.

Oqýshynyń aıtýynsha, úzdik jeńimpazdar Apple kompanııasy qarjylandyratyn bilim grantyna ıe bolady. Bul grant daryndy jastardyń San-Frantsısko qalasyndaǵy (AQSh) Apple keńsesinde tájirıbe jınaýǵa múmkindik beredi. Alaıda, álemde oryn alǵan pandemııaǵa baılanysty bul jospar keıinge qaldyrylǵany belgili boldy. Biraq, uıymdastyrýshylar atyraýlyq oqýshy Asqar Álmuhametovtiń eńbegin baǵalap, yntalandyrý úshin kompanııa atynan kúzgi kúrteshe, kádesyı men konkýrsqa qatysqany úshin dıplomdy tabystaǵan.

Asqar Álmuhametov –respýblıkalyq, halyqaralyq deńgeıdegi startap konkýrstardyń jeńimpazy. Buǵan deıin ol balalar úshin «Qulynym» mobıldik qosymshasyn jasaǵan. Bul qosymshada mektepke deıingi balalar úshin qazaqtildi kontent jınaqtalǵan. Keleshekte Nazarbaev Zııatkerlik mektebiniń oqýshysy IT salasyn jetik meńgerý arqyly ulttyq tehnologııa salasyn jańǵyrtýdy kózdep otyr.

Eske sala ketelik, budan buryn Atyraýlyq oqýshy volonterlerge arnalǵan mobıldik qosymsha jasap shyǵarǵan edi.