Antıvakserlerdi ınfektsııalyq aýrýhanaǵa aparyp, jaǵdaıdy kórsetkim keledi - Ajar Ǵınııat
2021 jylǵy 23 qarasha 23:14

Antıvakserlerdi ınfektsııalyq aýrýhanaǵa aparyp, jaǵdaıdy kórsetkim keledi - Ajar Ǵınııat

NUR-SULTAN. QazAqparat – Elimizdiń densaýlyq saqtaý mınıstriniń orynbasary Ajar Ǵınııat vaktsınaǵa senbeıtin jáne ony salýǵa qarsy adamdarǵa (antıvakserler) qatysty óz oıyn bólisti, dep habarlaıdy QazAqparat tilshisi.

«Men vaktsınaǵa qarsy adamdardy ınfektsııalyq aýrýhanaǵa alyp barsam deımin. Esh jaýap bermeı-aq, jaǵdaıdy tikeleı ózderine kórsetkim keledi. Ekpege qarsy bolyp mınıstrliktiń qabyldaýyna jazylǵan adamdarǵa aıttym da, júrińizder, ózderińiz kýá bolasyzdar dep. Onda COVID-19 ınfektsııasymen kúresip jatqan adamdar bir jutym aýaǵa zar. Іndetti asqyndyryp alsań saǵan eshqandaı vaktsına, dári nemese apparat kómektespeıdi», - dedi Ajar Ǵınııat tanymal telejúrgizýshi Láılá Sultanqyzyna bergen suhbatynda .

Sondaı-aq, vıtse-mınıstr antıvakserlerdi koronavırýspen kúresip jatqan aýrýhanalarǵa shaqyrǵanyn da aıtty.

«Óz basym senbeýshilerdiń kózin jetkizý úshin shaqyrdym. Tipti keıbir óńirde vaktsınaǵa qarsylyq tanytqandardy COVID-19 ortalyǵyna aparyp, jaǵdaımen tanystyrǵan densaýlyq saqtaý basqarmalary da bar. Basynda qarsy bolyp, keıin ózi koronavırýsqa shaldyqqan soń bastapqy oıynan bas tartqandar bar», - deıdi ol.

Buǵan deıin A. Ǵınııat elimizde jyl basynan beri 25 myń júkti áıeldiń koronavırýs indetine shaldyqqanyn aıtty.

Sondaı-aq, mınıstr orynbasary vaktsına almaǵan balalar mektepke kirmeıdi degen aqparatqa qatysty túsinik berip ótti.


Jańalyqtar

MURAǴAT