Ánshilik ónerdi qatar alyp júrgen polıtseı
2022 jylǵy 23 maýsym 14:42

Ánshilik ónerdi qatar alyp júrgen polıtseı

KÓKShETAÝ. QazAqparat - Jetken jetistikke toqmeıilsimeı, tek qana alǵa umtylý kerek. Bul Aqmola oblystyq Polıtsııa departamenti Kadr saıasaty basqarmasynyń ınspektory Qarlyǵash Táshimovanyń ómirlik ustanymy. Búgingi tańda ol Polıtsııa qataryndaǵy qyzmetimen birge, ánshilik ónerdi qatar alyp keledi.

- Qarlyǵash, Siz polıtsııa qyzmetine qalaı keldińiz? Áńgimeniń álqıssasyn osyndan bastasaq.

- Negizi polıtsııa qataryndaǵy qyzmetimdi 2005 jyly B.Momyshuly atyndaǵy ІІM Shymkent zań kolledjinen bastadym. Ol kezde talabym taýdaı, armanym asqaq edi. Keıin sol jastyq jigermen Qazaqstan Respýblıkasy ІІM Almaty akademııasynda bilim aldym. Sóıtip, Pavlodar oblysyndaǵy Baıanaýyl aýdanyna jumysqa ornalastym.

- Sizdi quqyq qorǵaý organdaryndaǵy qyzmetińizden bólek, sahyna tórinen de jıi kórip júrmiz. Tipti, halyqaralyq baıqaýlarǵa da qatysyp, bıik belesterdi baǵyndyryp júrsiz. Osy jaıyńda aıtyp ótseńiz.

- Iá, ras aıtasyz. Men jastaıymnan ánge áýes bolyp óstim. Boıymdaǵy ánshilik qabilet naǵashylarynan daryǵan. Alǵashqy ret mektep sahnasynda án aıtym. Keıin óse kele ándi kásibı deńgeıde oryndaı bastadym. Alaıda mektepti bitirgennen keıin óner salasyna ketpeı, polıtseı jolyn tandadym. Bul ata-anama jáne týysqandarym úshin kútpegen tańdaý boldy. Qazirgi kezde bul tańdaýyma esh ókinbeımin. Jetken jetistikke toqmeıilsimeı, tek qana alǵa umtylý kerek. Bul meniń ómirlik ustanymym. Osy arqyly negizgi qyzmetimmen birge, ánshilik ónerdi de qatar alyp kelemin. Máselen, 2008 jyly QR ІІM qyzmetkerleri arasynda ótken baıqaýǵa qatysyp, júldeli úshinshi orynnan kórindim. Bul meni qanattandyra tústi. Keıin 2011 jyly QR ІІM kórkemónerpazdarynyń respýblıkalyq «Jan júregim - Qazaqstan» atty patrıottyq ánder baıqaýyna 2-shi oryn aldy. Sondaı-aq 2014 jyly Máskeý qalasynda ótken «Eýrazııa telearnasynyń «Lýchshıı gorod KZ» 1-maýsymyna qatystym. Qazirgi kezde polıtsııa bólinisteriniń vokaldyq toptaryna múshemin. ІІM «Parasatty polıtseı» respýblıkalyq baıqaýynyń qatysyp, QR ІІM jáne Aqmola oblystyq PD basshylyǵynyń marapattaryna ıe boldym.

- Otbasyńyz týraly qysqasha aıtyp berseńiz.

- Men búgingi barlyq jetistikterime, jubaıymnyń qoldaýymen ǵana qol jetkizip otyrmyn (kúledi). Jubaıym Azamatpen Ekibastuz qalalyq polıtsııa basqarmasynda tanystym. Keıin dám-tuzymyz jarasyp, otbasyn quryp, shańyraq kóterdik. Azamatta ózim sııaqty polıtsııa qyzmetkeri. Qazir otbasymyzda ul men qyz tárbıelep otyrmyz. Bolashaqta balalarymyz qandaı mamandyqty tańdasa da, biz qoldaý bilderemiz. Adam balasy súıikti isimen aınalysatyn bolsa, sonda ǵana ol baqytty ekendigin sezinedi.

- Áńgimeńizge rahmet!


Uqsas jańalyqtar
Seriktester jańalyqtary

Jańalyqtar

Úrdis

MURAǴAT