Angela Keın álemge tóngen 7 qaýip-qaterdi atady
2021 jylǵy 15 qarasha 13:43

Angela Keın álemge tóngen 7 qaýip-qaterdi atady

NUR-SULTAN. QazAqparat – Qazir oryn alyp jatqan syn-tegeýirinniń barlyǵy álem tártibiniń zamanaýı júıesine qaýip tóndirip otyr. Bul týraly Astana klýbynyń 6-otyrysynda BUU Bas hatshysynyń burynǵy orynbasary Angela Keın aıtty, dep habarlaıdy QazAqparat tilshisi.

«Geosaıası turaqtylyq máselesi de óte ózekti. Klımattyń ózgerýi ǵalamshardaǵy bılik bólinisine áser ete me? Álde osyǵan baılanysty álemniń jańa kelbeti paıda bola ma? Qazirgi ýaqytta álemniń bir de bir memleketi jalǵyz júrip, bul problemalardy sheshe almaıdy. Búginde aýyz sýmen, azyq-túlikpen qamtamasyz etý, densaýlyq saqtaý máseleleri bárimizge ortaq problemaǵa aınalǵan. Afrıka men Ońtústik Amerıka resýrstary úshin álemdik deńgeıdegi básekelestik kúsheıip tur. Álemniń túkpir-túkpirinde ártúrli apattar da oryn alyp jatyr. Osy syn-tegeýirinniń barlyǵy qazirgi álem tártibiniń zamanaýı júıesine qaýip tóndirip otyr», - dedi Angela Keın.

Osy rette ol búkil álemge qatysty 7 qaýip-qaterdi atap ótti.

«Birinshisi - iri derjavalardyń arasyndaǵy múddeler qaqtyǵysy. Qazirgi kezde bul faktordyń ózektiligi artyp keledi. Ekinshisi – Amerıka polıarızatsııasy jáne onyń álemge kórsetetin yqpaly óte úlken. Qazir Amerıka jahandyq sýperımperııa emes. Reseı men Qytaı sol bılik vakýmyn toltyrýǵa tyrysyp baǵýda. Úshinshiden Qytaıǵa da saqtyqpen qaraý kerek. Óıtkeni, Qytaıdyń óz ishinde qysym bar. Oǵan ártúrli faktorlar áser etedi. Qazir Azııa Qytaı bıliginiń artýyna baılanysty óziniń álemdegi rólin kúsheıte túsýde. Tórtinshisi – Reseı jáne onyń AQSh múddesimen qaqtyǵysy. Bul rette Reseıdiń Amerıka saıasatkerlerine kóńili tolmaıdy. Besinshisi – Eýropa elderiniń ishki problemalardan zardap shegýi. Qazirgi ýaqytta popýlızm, terrorızm qaýpi, kóshi-qon daǵdarysy bar. Eýropa endi ǵana Aýǵanstan problemasynan qutyldy. Endi aldaǵy ýaqytta mundaı soǵystardan abaı bolýy kerek. Altynshysy – ıslam radıkalızmi jáne óńirlik turaqsyzdyq. Biz óńirlik qaqtyǵystardy baıqap otyrmyz. Jetinshisi - koronavırýs pandemııasy. Koronavırýs búkil álem elderine synaq. Sondyqtan óte kúrdeli, keshendi sheshimder qabyldaýǵa májbúr boldyq. Ásirese, azamattarymyzdyń quqyqtary men bostandyqtary shekteldi. Biraq, onyń bári ujymdyq qaýipsizdik úshin jasalyp jatyr», - dedi sheteldik sarapshy.


Jańalyqtar

MURAǴAT