Anar Jaıylǵanova: Prezıdenttik kadr rezervinde laýazymdy basshylardyń balalary joq
2021 jylǵy 27 jeltoqsan 13:43

Anar Jaıylǵanova: Prezıdenttik kadr rezervinde laýazymdy basshylardyń balalary joq

NUR-SULTAN. QazAqparat – Prezıdenttik jastar kadr rezervine úmitkerlerdiń arasynda joǵary laýazymdy tulǵalardyń týystary bar ma? Ortalyq kommýnıkatsııalar qyzmetinde ótken brıfıngide QR Memlekettik qyzmet isteri agenttiginiń tóraǵasy Anar Jaıylǵanovaǵa osyndaı saýal qoıyldy, dep habarlaıdy QazAqparat tilshisi.

«Iá, biz ol jaǵyn mindetti túrde tekseremiz. Olrdyń qatarynda joǵary laýazymdy sheneýnik týysy bar kandıdattar nemese laýazymdy tulǵalardyń balalary joq. Biz kerisinshe múmkindigi joq jastarǵa «áleýmettik lıft» úsynǵymyz keledi. Negizi olar konkýrsqa qatysyp-aq memlekettik qyzmetke bara alar edi. Biraq Prezıdenttik jastar kadr rezervi arqyly ótkisi kelse, nege bolmasqa? Bizde kadr rezervine ótken adamdardyń arasynda joǵary laýazymdy sheneýnikterdiń balalary joq», - dedi Anar Jaıylǵanova.

Shara barysynda bıyl Prezıdenttiń jastar kadr rezervin irikteýge bıýdjetten 70 mln teńge jumsalǵany belgili boldy.

«2021 jyly Prezıdenttik jastar kadr rezervin irikteý jumysyn uıymdastyrýǵa memleket bıýdjetinen 70 mln teńgege jýyq qarjy bólingen. Ol qarajat ІT-platformany daıyndaýǵa, sarapshylardy tartýǵa, assesment-ortalyq uıymdastyrýǵa jumsaldy», - dedi QR Prezıdenti janyndaǵy Memlekettik basqarý akademııasynyń rektory Erlan Ábil.


Jańalyqtar

Úrdis

MURAǴAT