«Altyn orda» bazarynda básekelestikti qorǵaý talaptary óreskel buzylǵan – agenttik
2022 jylǵy 22 maýsym 22:15

«Altyn orda» bazarynda básekelestikti qorǵaý talaptary óreskel buzylǵan – agenttik

ALMATY. QazAqparat – «Altyn orda» bazarynyń saýda naryǵyna qatysty básekelestik zańnamany saqtaýdy tekserý nátıjesi boıynsha ákimshilik is qozǵaldy, dep habarlaıdy QazAqparat tilshisi QR Básekelestikti qorǵaý jáne damytý agenttigine silteme jasap.

Agenttiktiń málimetinshe, bıylǵy naýryz aıynda Almaty oblysy boıynsha monopolııaǵa qarsy departamenti «Altyn Orda QazTrade LTD» JShS-nyń qyzmetine tekserý júrgizgen. Tekserý barysynda saýda ornyn kúndelikti jalǵa alý baǵasy júk kóliginen 15 000 teńge, KAMAZ jáne MAN avtokólikterinen 7000-8000 teńge, Sprinter avtokóliginen 6000-7000 teńge, GAZel avtokóliginen 5000 teńge, jeńil avtokólikterden 3500 teńge ekeni anyqtaldy.

Osyǵan oraı, Almaty oblysy boıynsha monopolııamen kúres departamenti saýda oryndaryn usyný qyzmetteri naryǵyndaǵy básekeles ortanyń jaı-kúıine taldaý jáne baǵalaý júrgizgen. Taldaý nátıjesi boıynsha «Altyn Orda QazTrade Ltd» JShS 100% úlesimen monopolıst ekeni, básekelestikti qorǵaý salasyndaǵy zańnamany buzǵany anyqtalǵan.

«Tekserý qorytyndysy boıynsha 2022 jyldyń mamyr aıynda «Altyn Orda QazTrade LTD» JShS-ne qatysty ákimshilik is qozǵaldy. Materıaldar Almaty oblysy Qarasaı ákimshilik quqyq buzýshylyqtar jónindegi mamandandyrylǵan aýdanaralyq sotyna joldandy», - delingen Básekelestikti qorǵaý jáne damytý agenttiginiń habarlamasynda.

Eske salaıyq, buǵan deıin «Altyn Orda» bazarynyń ıeleri 1,5 mlrd teńge salyq tólegenin

jáne «Altyn orda» bazarynda 1,6 mlrd teńge kóleminde zańbuzýshylyq anyqtalǵanyn habarlaǵan bolatynbyz.



Jańalyqtar

Úrdis

MURAǴAT