«Altyn Orda» bazary tóńiregindegi daý áli basylar emes
2022 jylǵy 30 maýsym 17:41

«Altyn Orda» bazary tóńiregindegi daý áli basylar emes

ALMATY. QazAqparat – Almatydaǵy «Altyn Orda» bazarynyń tóńiregindegi daý basylar emes. Qoǵam belsendileri sáýir aıynda basshylyq aýysqanymen, saýda ornynda zań buzýshylyqtar toqtamaǵanyn aıtady. Búgin Nur-Sultan qalasynda osyǵan baılanysty baspasóz máslıhaty ótip, biraz jaıttar aıtyldy, dep habarlaıdy QazAqparat.

Baspasóz máslıhatynda zańger Dáýren Ǵabdýl «Altyn ordadaǵy» bassyzdyqtyń áli jalǵasyp kele jatqanyn alǵa tartady. Onyń aıtýynsha, qazir bazardy kórshi elderden kelgen toptar bólshektep alyp, ózara bılik júrgizýge kóshken. Bundaǵy saýdagerler suǵanaq qoldar kóbeıgenin, olardyń jazasyzdyǵyn, qoldan qymbatshylyq jasalyp jatqanyn aıtyp shaǵymdanypty. Sonymen qatar, bazarda nápaqasyn aıyryp júrgender «Altyn ordanyń» qazirgi qojaıyny tıisti jumystardy júrgize almaı jatqanyn, al sońǵy kezderi bolyp jatqan zańsyzdyqtarǵa bazardyń búgingi ıeleri jaýap berip, tártip ornatýǵa mindetti ekenin aıtqan.

Sondaı-aq bazardaǵy saýdagerler «Altyn ordanyń» qazirgi qojaıyny tıisti jumystardy júrgizip, tártipke keltire almaı jatyr degen pikirde eken. Al zańger Dáýren Ǵabdýl kompanııada 95 paıyz úlesi bar astanadaǵy ekonomıkalyq tergeý departamentiniń burynǵy qyzmetkeriniń quryltaıshylar quramyna qalaı kirgeni belgisiz dep otyr.

«Bul shaǵyn saýda orny emes, iri logıstıkalyq torap. Almaty qalasy men Almaty oblysyn qamtamasyz etip otyrǵan saýda orny. Kemi 3 mıllıon adam degen sóz. Sondyqtan startegııalyq nysan dese de bolady. Eger bazardyń jumysynda aqaý bolsa, bul árqaısymyzdyń dastarqanymyzdaǵy nanymyzǵa, jep otyrǵan etimizge deıin áser etedi. Sondyqtan «Altyn ordanyń» taǵdyry bárimizdi alańdatýy kerek», deıdi zańger.

Aıta keterligi, Almatydaǵy «Altyn orda» – elimizdiń eń iri megapolısin negizgi azyq-túlik ónimderimen qamtamasyz etetin saýda orny. Memleket basshysy sondyqtan da «Altyn Orda» bazarynyń qyzmetin retke keltirýge qatysty tapsyrma bergen de bolatyn. Al osydan 3 aı buryn kelgen jańa qojaıyn bazardyń deldaldar aralasýymen kóteriletin baǵasyna qatysty bylyqtaryn joıýǵa ýáde etken. Sonymen qatar, «Altyn ordanyń» burynǵy quryltaıshylarynyń ústinen 2017 jyly bazardy reıderlik jolmen tartyp alǵany týraly aryz túsken bolatyn. Zańgerdiń sózine qaraǵanda, bylyq áli basylmaı, burynǵy ıeleri bazardy qaıta ıemdenýge árekettenip jatyr.

Eske sala keteıik, aqpan aıynda Memleket basshysy Úkimet pen ákimdikterge «Altyn orda» bazaryn tártipke keltirýdi tapsyrǵan.

Sýret: matritca.kz

Jańalyqtar

Úrdis

MURAǴAT