Almatynyń Túrksib aýdanynda qosymsha 300-den astam beınebaqylaý kamerasy ornatylady
2022 jylǵy 1 shilde 05:26

Almatynyń Túrksib aýdanynda qosymsha 300-den astam beınebaqylaý kamerasy ornatylady

ALMATY. QazAqparat – Almaty qalasynyń Túrksib aýdanynda joldar men adam kóp jınalatyn oryndarda beınebaqylaý kameralarynyń sany artady, dep habarlaıdy QazAqparat tilshisi.

Aýdan turǵyndarymen kezdesý barysynda qala ákimi Erbolat Dosaev bıyl joldarda «Sergek» apparattyq-baǵdarlamalyq kesheniniń sany eki esege, ıaǵnı, 82-den 160-qa deıin artatynyn atap ótti.

«Qosymsha 322 beınebaqylaý kamerasy ornatylady. Onyń 111-i jol qıylystarynda, 76-sy aýlalarda, 18-i saıabaqtar men gúlzarlarda, 90-y bilim berý jáne densaýlyq saqtaý nysandarynda, 15-i dinı nysandarda, 10-y bazarlarda ornatylady», - dedi qala ákimi.

Budan bólek, telekommýnıkatsııalyq ınfraqurylymdy damytý sheńberinde joǵary jyldamdyqty ınternetke qosylý jumystary jalǵasýda.

«Bıyl talshyqty-optıkalyq baılanys jelisine 342 úı qosyldy, onyń ishinde «Qaırat» shaǵyn aýdanynda - 317, «Álmerek» shaǵyn aýdanynda - 25. Jyl sońyna deıin Baým toǵaıy men 25 myńǵa jýyq turǵyny bar «Tómengi Pıatıletka» shaǵyn aýdandaryn qosý josparda bar», – dedi Erbolat Dosaev.

Eske salaıyq, buǵan deıin Almatyda «Sergek» beınekameralarynyń sany artatynyn habarlaǵan bolatynbyz.

Uqsas jańalyqtar

Jańalyqtar

Úrdis

MURAǴAT