Almatynyń ár aýdanynda aýyzsý sapasy nelikten ártúrli
ALMATY. QazAqparat – «Almaty sý» memlekettik kommýnaldyq kásipornynyń resmı ókili Serik Shaǵyrov qalanyń ár aýdanynda aýyzsý sapasy nelikten ártúrli ekenin aıtty, dep habarlaıdy QazAqparat tilshisi.
Onyń málimetinshe, aýyzsý kúıi úsh túrde – óte jumsaq, ortasha qatty jáne neǵurlym qatty bolady.
«Qalanyń Bostandyq, Medeý jáne Almaly aýdandarynyń basym bóliginde taý kózderiniń sýlary, ıaǵnı, óte jumsaq sýlar aǵady.
Qalanyń orta bóliginde taý sýy men jerasty sýlary aralasatyn bolǵan soń, munda aýyzsý ortasha qatty kúıde.
Qalanyń tómengi bóliginde neǵurlym qatty sýlar aǵady, sebebi, onda tek jerasty sýlary ǵana keledi», – dedi Serik Shaǵyrov Óńirlik kommýnıkatsııalar qyzmeti alańynda ótken brıfıngide.
Spıker sondaı-aq aýyzsýdyń hımııalyq quramy týraly aıtty.
«Aýyzsýdyń sapasyn sý qaǵy arqyly anyqtaýǵa bolmaıdy. Sý qaǵy – bul tuz, magnıı jáne kaltsıı. Sondaı-aq sýda ártúrli mıneraldar, hımııalyq zattar bolady. Tuz, magnıı jáne kaltsıı kez kelgen aýyzsýdyń ajyramas bóligi bolyp tabylady. Ol fıltrden ótken sýdan sonysymen erekshelenedi» - dedi Serik Shaǵyrov.
