Almatylyqtar mobıldi qosymsha arqyly polıtsııamen baılanysa alady

ALMATY. QazAqparat - Almaty polıtsııasy «INFOGOV» mobıldi qosymshasyn paıdalanýǵa keńes beredi, dep habarlaıdy QazAqparat tilshisi. 

«Bul qyzmet azamattarǵa ártúrli keleńsiz jaıttardy sýretke, beınetaspaǵa túsirip, aýdıo jazyp alýǵa múmkindik beredi. Sondaı-aq, smartfonǵa ornatylǵan mobıldi qosymshany paıdalanyp, serverge jibere alady. Polıtsııa óz kezeginde kelip túsken derekterge súıene otyryp, habarlamalar kartasyn jasaıdy jáne jol-kólik oqıǵalarynyń aldyn alý úshin aqparatqa taldaý júrgizedi. Interaktıvti kommýnıkatsııa júıesi azamattar men polıtsııanyń birlesip jumys isteýine múmkindik beredi», - dedi Almaty polıtsııa departamentiniń bastyǵy Serik Kúdebaev.

Sonymen birge, polıtsııanyń málimetinshe, buqaralyq aqparat quraldarynda, áleýmettik jelilerde shyqqan materıaldarǵa taldaý men monıtorıng júrgizý jalǵasýda.

«Biz barlyq dabylǵa tıisti sharalar qabyldaý arqyly dereý jaýap beremiz. Qazirgi ýaqytta departamenttiń resmı saıtynda «Basshy blogy» ashyldy, azamattar sol arqyly suraqtaryna jaýap ala alady jáne ýaqtyly kómek kórsetiledi. Jyl basynan beri turǵyndardan 1 310 ótinish kelip tústi. Tájirıbe kórsetkendeı, bul - qoǵammen qarym-qatynastyń eń tıimdi túrleriniń biri», - dedi Serik Kúdebaev.