Almatylyq qutqarýshylar turǵyndarǵa taýǵa shyqpaýǵa keńes berdi

ALMATY. QazAqparat - Aýa raıynyń nasharlaýyna baılanysty Tótenshe jaǵdaılar departamenti turǵyndarǵa taýǵa shyqpaýǵa keńes berdi, dep habarlaıdy QazAqparat tilshisi.

«Qazgıdromet» taratqan eskertý negizinde Almatynyń Tótenshe jaǵdaılar qyzmeti turǵyndarǵa taýǵa shyqpaýǵa keńes beredi. 17-19 qańtar kúni taýly aımaqtarda qalyń tuman túsip, qóktaıǵaq bolady. Soltústik-batystan sekýndyna 15-20 metr jel soǵady. Jaýyn-shashyn kútiledi.

Osyǵan baılanysty TJD Almaty turǵyndary men qonaqtaryna mynadaı qaýipsizdik sharalaryn saqtaýdy usynady:

- Qatty jaýyn-shashyn ( qar, jańbyr) nemese qatty daýyl týraly eskertý jarııalanǵan jaǵdaıda, taýly aımaqqa barýdy keıinge qaldyrǵan durys;

- Eger siz kishigirim topyraq kóshkinderdi baıqasańyz, onda taýǵa barmaǵanyńyz jón. Qarqyndy jaýyn-shashyn túsken jaǵdaıda tómen taýly aımaqta topyraq kóshkini bolýy múmkin;

- Eger siz taýda bolsańyz, muqııat bolyńyz jáne aýa raıynyń ózgerýin qadaǵalańyz;

- Eger siz taý bókterinde qardyń jyljýyn, qardyń túıirshikterin baıqasańyz, onda taýlarǵa barmaǵanyńyz jón-bul qardyń turaqsyz kúıde ekenin, kóshkinniń qaýipi múmkin ekenin bildiredi;

- Úıge qaıtýdy táýliktiń kesh ýaqytyna keshiktirmeńiz, keri baǵytty taba almaýyńyz múmkin;

- Rıýkzaktarda mynalar bolýy tıis: jyly kıimder,kútpegen jaǵdaıda dárigerge deıingi kómek kórsetýge arnalǵan dári qobdıshasy, GPS navıgatorlarynyń bolýy artyq bolmaıdy;

- Eshbir jaǵdaıda taýǵa jalǵyz barmańyz;

- Týǵan-týystaryńyz ben jaqyndaryńyzdy marshrýtyńyzdyń baǵyty jáne ornalasqan jerińizdi barynsha tolyq habardar etý óte mańyzdy.