Almatylyq dárigerler bas súıekti 3D ımplanttyń kómegimen qalpyna keltirdi
2022 jylǵy 23 maýsym 23:59

Almatylyq dárigerler bas súıekti 3D ımplanttyń kómegimen qalpyna keltirdi

ALMATY. QazAqparat - Almaty qalalyq klınıkalyq aýrýhanada 20 jastaǵy patsıenttiń bas súıegi qaıta qalpyna keltirildi, dep habarlaıdy QazAqparat.

Densaýlyq saqtaý mekemesiniń málimetinshe, dárigerler oǵan tıtannan jasalǵan 3D plastına ornatqan. Kúrdeli operatsııa mindetti áleýmettik medıtsınalyq saqtandyrý sheńberinde jasaldy.

Habarlamaǵa súıensek, jas jigitke osymen ekinshi ret ota jasalyp otyr. Buǵan deıin patsıent joǵarydan qulap, aýyr bas-mı jaraqatyn alǵan. Alǵashynda mamandar súıekti tesip, trepanatsııa jasap, protez ornatqan.

«Plastıkalyq operatsııadan keıin naýqas taǵy qulap, ornatylǵan protezdi syndyryp alǵan. Áriptestermen aqyldasa kele, bir mezette synǵan akrıl protezdi alyp tastap, tıtannan jasalǵan 3D plastına ornatý týraly sheshim qabyldadyq», - deıdi №2 Neırohırýrgııa bólimshesi meńgerýshisi Ildar Qurmaev.

Mamannyń aıtýynsha, kranıoplastıka dep atalatyn ota ádette, bastaǵy uıyǵan qandy, isikti alǵannan keıin, bas súıektiń synǵan bólikterin alyp tastaǵannan soń jasalady. Ol mıdyń qaıta zaqymdanýyna jol bermeı, jaraqattan keıin bolatyn asqynýlardyń aldyn alady. Patsıentter operatsııadan keıin jetinshi kúni aýrýhanadan shyǵady, otanyń orny 10-12 kúnnen soń jazylady.

«Bizdiń bólimshede jyl saıyn bas-mı jaraqatyn alǵan 1 myńǵa jýyq patsıent emdeledi. Bir jylda bas súıek defektilerin jabý boıynsha 100-ge jýyq operatsııa jasalady. Olardyń arasynda Almatynyń ǵana emes, elimizdiń túrli óńirlerinen kelgen turǵyndar da bar. Akrıldi tsement protezderdiń, tıtan torshalar men plastınalardyń úlgisin qolmen jáne 3D kompıýtermen modeldeý tásilderi qoldanylady, – deıdi Ildar Qurmaev.


Seriktester jańalyqtary

Jańalyqtar

Úrdis

MURAǴAT